WA pa’y nadawat nga report ang Provincial Agriculturist Office (PAO) labot sa pagsiaw sa red tide toxin dinhi sa Sugbo, sukad gikataho ang pagka kontaminado niini sa pipila ka kinhason sa lalawigan sa Bohol.
Gitug-an sa supervising agriculturist sa Fisheries Division, Virgilio Jakosalem, nga matag buwan mopahigayon ang ilang opisina og surveillance batok sa red tide.
Gani sa matag duha ka semana, mohimo sila og kausa niini.
Matod ni Jakosalem nga partikular nila nga buhaton mao ang pag-eksamin sa tubig gikan sa dagat sa nagkadaiyang bahin sa probinsiya aron masuta kon dili kini kontaminado sa red tide toxin.
Ang red tide mosiaw tungod sa pagdagsang sa talagsaong matang sa algae nga makahilo ug kon dunay kalit nga pag-usab sa panahon, gikan sa grabeng kainit ngadto sa pag-ulan.