MAGTUKOD og local task force ang Cebu Provincial Anti-Drug Abuse Commission nga maoy mosumpo sa narco-politics sa lalawigan sa Sugbo.

Si Provincial Board Member Ivy Durano-Meca, vice chair sa Cpadac, nibutyag nga gitahasan siya ni Gob. Hilario Davide III sa pagtukod og task force aron masulbad ang isyu sa narco-politics, labi na naghinangat ang eleksyon sa sunod tuig.

“Di nato ika-deny nga narco-politics really exists here in the province,” pahayag sa bokal.

Wa na hinuon siya mohatag og dugang detalye sa tukuron nga task force.

Si Joey Herrera, executive director sa Cpadac, niingon nga suportado sa mga mayor ang anti-illegal drugs campaign ubos sa Limpyo Probinsya program.

Ang mga mayor motaho sa Cpadac bahin sa giingong pipila ka mga personalidad nga nalambigit sa gidili nga druga ug ang ilang report iduso ngadto sa kapulisan alang sa verification.

Matod ni Herrera, pinaagi sa pagtandiay sa listahan sa mga drug personality nga iduso sa hepe sa kapulisan ug sa listahan sa Barangay Anti-Drug Abuse Council ug Cpadac, mahibaw-an kon unsa nga police station ang nagmika batok sa illegal drugs.

“Ma-connect man gud na nato basin gipugngan siya sa mayor o kahibawo siya masuko unya ang mayor,” sumala ni Herrera.

Si Cebu Provincial Police Office Director Noel Gillamac nimando sa iyang mga sakop nga di magpadala sa pressure ug magpagamit og mga pulitiko sa pagsumpo sa problema sa gidili nga druga.

“If there’s a drug pus­her there immediately you conduct raid and arrest these people,” dugang niya.

Si Gillamac nipasigarbo nga gumikan sa ilang malampusong mga operasyon batok drugas, ang CPPO maoy nag-una sa tibuok rehiyon siyete nga labing daghang mga operasyon ug kinadak-an nga nasakmit nga drugas.

Siya nidugang nga ang kapulisan sa mga lungsod sa Argao ug Liloan ingon man Carcar City ang mga top performer sa pagsumpo sa gidiling drugas.

Ang hepe, matod niya, mapakyas pagtuman sa iyang mandato imbestigahon sa Provincial Investigation Detection and Ma­nagement Bureau ug hayan mag-atubang og kaso.