Sigarilyo gitumbok nag-unang kontrabando sa pantalan

MGA sigarilyo maoy nag-unang kontrabandong produkto sa pantalan sa dakbayan sa Davao human nga daghang nasakmit atol sa gilusad nga operasyon nga gihimo sa Bureau of Customs (BOC)-Davao sud ug gawas lugar ning tuiga.

Sa paghinabi uban kang BOC-Davao Chief Collector Lawyer Erastus Austria, gikanayon niini nga ang Bureau nakahimo sa pagsakmit sa 2,500 mga kahon sa sigarilyo gikan Enero hangtud Septyembre karong tuiga kantidad sa gatusan ka libo ka pesos.

Matud ni Austria nga ang nasakmit nga mga sigarilyo gipadala gikan sa laing kanasuran sa Asian pinaagi sa ilegal nga importers ug distributors sa nasud.

"We do not understand why those involved in the illegal importation of cigarettes continue to ship and sell it when they know that it will not be tolerated here," tin-aw pa sa opisyal.

Kasagaran sa nasakmit nga sigarilyo nakuha atol sa "search and confiscate" operations nga gilusad sa BOC 11 ug Philippine National Police (PNP) sa mga bodega sulod sa dakbayan pinaagi sa Warrant of Seizure and Detention.

Sumala sa BOC-Davao nga kasamtangan nilang gihimo ang Letter for Condemnation nga ipadala sa ilang sentral nga buhatan sa katapusan sa bulan kon diin ang BOC mangayo og permiso nga kunis-kunison ang nasakmit nga mga sigarilyo pinaagi sa "grinding process" sa pasilidad sulod sa BOC ug gipasalig nga di kini ipayuhot sa bisan kinsa sa ilang personahe.

Gawas sa ilegal nga pagsulod sa mga sigarilyo, mga sininang ukay-ukay sab ang nahimong kontrabando sa pantalan karong tuiga.

Gisulti ni Austria nga ang pantalan nakahimo sa pagsakmit og di mokapin sa 40 ka container vans matag bulan karong tuiga nga nahimo na karong problema sa pantalan kay ang mga sinina gidispatsar na sulod sa nataran sa pantalan.

"We want to donate all of these to Maraw City but we cannot because Department of Social Welfare and Development (DSWD) has already closed clothing donations," tin-aw ni Austria.

Ang mga ukay-ukay nga sinina giplanong isubasta apan ang BOC naghuwat pa sa pagtugot gikan sa ilang sentrong buhatan.

Dugang ni Austria nga ang subasta alang sa mga ukay-ukay dako og tabang alang sa Bureau aron nga mopadako sa kita subay sa mando sa BOC Chief Isidro Lapeña.

Sa dihang gipangutana kon nganong duna pay daghang mamaligya og ukay-ukay sellers sa siyudad sa Davao, matud niya nga ang mga importers posibleng nagbiyahe sa mga butang pinaagi sa laing paagi sama sa "land transit".

Apan gibutyag niya nga ang BOC mipasalig ngadto sa publiko nga istrikto nilang imonitor ug ipatuman ang ilang gahum sa pagpakgang sa pagsulod sa tanang mga kontrabandong mga produkto sulod sa rehiyon bisan pa og kuwang sila og mga tawo ug pasilidad.

"We have to protect our local manufacturers, farmers, and producers against these illegal foreign sellers as our local industry has to be the topmost priority in our country," pasalig ni Austria.