NAANGKON sa Rain or Shine Elasto Painters ang katapusang luna sa semi-finals human nila gipintalan og dakong kapildihan ang Talk N’ Text Tropang Texters, 104-89, niadtong Lunes sa gabii sa Philippine Basketball Association (PBA) Philippine Cup sa Mall of Asia Arena sa Pasay City.
Si Raymond Almazan nimugna og double-double nga 15 puntos ug 10 rebounds aron pangulohan ang Elasto Painters, nga aduna pa’y laing lima ka mga magduduwa nga nakahimo og double-digit nga puntos.
Ang rookie nga si Don Trollano nitampo og 14 puntos alang sa kadaugan, nihatag og 13 puntos si Jeff Chan, ningtampo og 11 puntos matag usa sila si Gabe Norwood, Jericho Cruz ug JR Quinahan samtang nitunol og 10 puntos si Maverick Ahanmisi.
Sa kadaugan, ang Elasto Painters ning-abante sa semi-finals aron makigharong sa defending champion San Miguel Beermen alang sa best-of-seven series.
Bangis nga gisugdan sa Elasto Painters ang duwa ug sayo nilang gipanglubong ang Tropang Texters, 20-9. Niini pa lang puntos, si Almazan nakahimo na og siyam ka mga puntos.
Sa pagpangulo ni Jayson Castro, ang Tropang Texters nakamaneho pagpahak sa labaw sa Elasto Painters, 20-24, sa hinapos nga bahin sa 1st quarter.
Sa 2nd quarter, si Trollano na sab ang miagak sa opensa sa Elasto Painters ug nainat niya pagbalik ang ilang labaw ngadto sa 36-22.
Nagkumboya si Castro ug Ryan Reyes aron pasikiton og balik ang Tropang Texters, 42-43.
Human niini, nadugkatan ni Chris Tiu ang laing pagbulhot sa opensa sa Elasto Painters nga nakainat na sab og balik sa ilang bintaha, 52-44, sa halftime.
Sa 3rd quarter, nagtinubagay sa pagmugna og puntos ang duha ka mga kampo ug ning sitwasyuna, nakapabor ang Elasto Painters kay sila man maoy naggunit sa labaw.
Sa ngadto-ngadto, ningpatigbabaw gyud ang puwersa sa Elasto Painters ug nakaposte sila’g 83-69 nga labaw.
Gikan niini, wala na molingi pagbalik ang Elasto Painters ug ninglahos na kini paingon sa kadaugan.
Puntos matag usa
Rain or Shine (104) – Almazan 15, Trollano 14, Chan 13, Norwood 11, Quinahan 11, Cruz 11, Ahanmisi 10, Ponferada 8, Belga 6, Tiu 5
TNT (89) – Castro 25, Tautuaa 14, Aban 11, R. Reyes 10, Seigle 10, Rosario 10, Williams 5, J. Reyes 2, Fonacier 1, Ganuelas-Rosser 1.