ANIA na sab si Presidente Benigno A­quino III sa Sugbo ugma aron ma­ngulo sa seremonya sa groundbreaking sa passenger terminal 2 sa Mactan Cebu International Airport.

Kini ang ikaduhang higayon nga mobisita sa Sugbo ang presidente sulod ning tuiga.

Gikan sa Palawan, si Aquino mo­abot sa tugpahanan alas 2 sa hapon uban nila ni Department of Interior and Local Government Secretary Mar Roxas ug Department of Tou­rism Secretary Ramon Jimenez, Jr.

Sugaton sila nila ni Grandhi Mallikajurna Rao, founder chairman sa GMR Group, GMCAC Pre­sident Louie Ferrer, ug ubang mga opisyal.

Ang GMR-Megawide Cebu Airport Corp. (GMCAC), usa ka joint venture sa GMR Infrastructure Ltd. sa India ug Megawide Construction Corp. of the Philippines, maoy motukod sa terminal 2 nga gilaoman mahuman sa 2018.

Ang GMCAC, ang kompaniya nga nagdumala sa terminal operations sa MCIA ubos sa Public-Private Partnership sud sa 25 ka tuig nga concession agreement, tali sa Mactan Cebu International Airport Autho­rity ug Department of Transportation and Communication.

Ang GMCAC namuhunan og P32 bilyones alang sa phase 1 sa pagpalambo sa terminal 2, apil na niini ang P14.5 bilyones nga una nang nabayad sa GMCAC ngadto sa gobiyerno sa Pilipinas nga nakadeposito karon sa Land Bank of the Philippines ubos sa account sa MCIAA.

Ang groundbreaking sa T2 pro­ject nga tambungan ni Aquino alang lang sa phase development nga nagkantidad og P17.5 bilyones.

Ang terminal 2, nahimutang tapad lang sa kasamtangan nga terminal, adunay gibanabanang gidak-on nga 50,000 metro kwadrado uban sa modular expansion capacity.

Si Ferrer, nagkanayon kon mahuman ang terminal 2 motubo ang kinatibuk-ang kapasidad sa MCIA gikan sa 4.5 milyones ka mga pa­sahero ngadto sa 12.5 milyones ka mga pasahero.

“The airport terminals will reflect the rich Cebuano heritage in a state of the art design with a soo­thing resort-like atmosphere conceptualized by international and Cebuano designers,” matod niya.

Ang architectural features niini motugma sa modern building materials ug sa kultura ug kabilin sa mga Sugbuanon.