HEPE sa kapulisan sa Central Visayas mirespeto sa migawas sa SWS survey nga nagpakita nga sobra sa katunga sa mga Filipino ang nagtuo nga ang napatay sa drug war sa kapulisan pulos mga kabus.
Wa isalikway ni P/CSupt. Jose Mario Espino nga ang napatay sa lihitimong anti-drug operation sa kapulisan pulos mga kabus sanglit sila man ang nalambigit sa ilegal nga drugas.
Dakong salapi ang maangkon sa nagpadagan sa ilegal nga drugas diin kasagaran naa sa kabus nga kahimtang ang mosugal tungod sa kalisud sa panahon.
Apan iyang giklaro nga wa ni magpasabot nga wa silay nasikop ug napatay nga mga adunahan na sama niadtong mga kanhi police ug aktibo pa sa serbisyo nga padayon sa ilegal nga negosyo.
Usa sa iyang gisanglitan ang kanhi sakop sa Special Weapons and Tactics (SWAT) sa kapulisan sa probinsya sa Sugbo nga si PO3 Ryan Quiamco.
Kagahapon sa alas 9:00 sa buntag lang kanhi usab police sa Talibon Bohol ang napatay sa engkwentro sa kapulisan nga giila sa ngan nga Eduardo Bonado.
Gipakita usab niya ang datus sa ilang accomplishments sa mga nangadakpan nga mga High Value Target nga napasakaan na ug kaso sa korte.
“We are not conducting drug operation just a specific sector, based on my survey as police officer its really enticing for you to be involve in illegal drug transaction because of the profit,” matod ni Espino.
Wa usab ihimakak ni Espino nga duna pay kapin sa 1000 ka mga napatay nga wa malakip sa anti-drug war sa kapulisan nga padayon ang gihimong imbestigasyon sa homicide section.
Dako ang pagtuo sa PRO-7 director nga ang mga napatay hinimoan ra usab ni sa ilang mga kaatbang sa ilegal nga negosyo.
Nakasabot ra siya sa komento sa publiko tungod sa sunod-sunod nga kontrobersiya nga nasugatan ang kapulisan.
Gipasabot ni Espino nga sa krimen nga nahitabo lukop nasud 90 porsiyento niini dunay kalambigitan sa drugas. (AYB)