BANSALAN, Davao del Sur - Gipangunahan sa mga personahe sa Davao del Sur Police Provincial Office (DSPPO) ang pagpahigayon og symposium bahin sa martial law ug anti-hazing law.
Sumala ni Senior Supt. Samuel Gadingan, police provincial director, gihimo nila ang panagtigum didto sa University of Mindanao Bansalan College (UMBC), ala 1 sa hapon niadtong Martes.
Si Gadingan nagbutyag nga mahinungdanong masayran sa mga tinun-an kon unsa ang ilang mga katungod ilawom sa martial law ug kon unsa ang mga kasong atubangon kon mohimo og hazing sa ilang mga fraternity and sorority sanglit supak kini sa balaod.
Kuyog sa DSPPO si Abogado ug Supt. Arnold Barcenilla nga mao ang provincial legal officer sa DSPPO.
Gawas sa maong diskusyon gihisgutan sab sa kapulisan ang bomb awareness ug sexual harrasment sanglit anaa ang mga personahe sa Explosive Ordnance Disposal Team (EODT) ug Police Community Relations (PCR).
Tungod sa maong kalihukan, gihangop ni Prof. Jenny Hernan, dean sa UMBC ang paghatag og libreng impormasyon ngadto sa ilang mga tinun-an.
Adunay kapin kun kulang 200 ka mga tinun-an ang naminaw sa maong symposium.
Sumala sa tinun-ang si Warren Nahial, criminology student, nga dako og gikatabang kanila ang nakat-onan sa maong symposium tungod kay nadugangan ang ilang kahibalo sa mga mahinungdanong balaod.
Samtang, gitataw ni Gadingan nga himuon sab nila sa ubang mga tunghaan ang maong aktibidad.
Nagpahinumdom sab ang kapulisan sa tanang sakop sa fraternity nga likayan ang paghimo og hazing aron di manubag sa balaod.