KON hilig nimo ang adventure ug pasingot, adunay suroyanan sa lungsod sa Dalaguete, habagatang Sugbo, nga segurado masukod ang imong endurance, flexibility ug kalig-on sa lawas.
Kini ang Dingayop Cave o giila sa uban nga Eagle’s Cave sa Barangay Obo, gibana-banang 13 kilometros ang gilay-on gikan sa nasudnong highway.
Pag-abot pa lang nimo sa Tramline 1, sugaton ka sa nindot nga talan-awon diin makita ang kabungturan nga haom alang sa mga hilig mag-selfie o groupie.
Abtik usab ang mga cave guide nga mohatag nimo sa mga kasayoran nga angay mahibaw-an bahin sa langob.
Matod ni Dalaguete Tourism Officer Victor Caruz, 10 ka mga cave guide ang gibansay sa Department of Tourism nga magsilbi nga mga gabay sa mga turista.
Sa di pa sugdan ang 20 minutos nga baktas paingon sa langob nga nahimutang sa kinapusoran sa lasang, kinahanglan mosuwat una ka sa imong pangan sa log book.
Sa pagsugod, yano pa ang paglakaw nga sama anaa ka sa park gumikan sa colorful nga mga buwak sama sa rose, cosmos, flordeliz ug pasulangga ug tapaytapay nga maoy tawag sa lokal nga mga molupyo.
Sa 1.2 kilometros nga trekking gikan sa Tramline 1 padung sa langob, malabyan nimo ang plantasyon sa sibuyas dahunon o ang gitawag sa mga lokal sa dapit nga 10,000 sibuyas. Duna usab tanaman sa baguio beans ug paliya sa dapit.
Sa pagpadayon nimo og baktas, magkadulhog usab ang dalan nga imong subayon paingon sa langob agi sa higanteng mga punoan sa kahoy, ug madungog ang tinagaktak nga tubig sa falls.
Samtang magkaduol ka sa langob agi sa lasang, mas kulbahinam ang pagbaktas tungod kay dangugon ug titip na agianan nga subayon, usahay dunay higayon nga ikaw mokamang, mokatkat ug mogunit sa mga ugat sa kahoy samtang magbalanse sa imong lawas aron di maligid paingon sa ubos.
Human sa 20 minutos nga baktas, makita na ang ganghaan sa langob, ang dagkong mga bato diha sa baba sa Dingayop Cave.
Gawas sa adventure, makakat-on usab ka sa mga cave guide apil sa magtiayon nga sila si Roldan Hino, 35, ug Timotea Hino, 41, ingon man si Warlito Santillan, 46, kay tudloan ka bahin sa mga bato ug ubang nilalang nga makita sa cave.
Sa sud sa cave, makit-an nimo ang buhi nga stalactites, stalagmites ug ubang rock formations sama sa soda straw, helictites, popcorn, bacon, column, shark teeth, bell hole, flow stone ug uban pa.
Sa 500 metros nga gitas-on sa langob, dunay pipila ka bahin niini nga kinahanglan ka mokamang gumikan kay halos ang stalactites mohawok na sa yuta ug dili kini angay masabod aron dili mamatay.
Matod ni Timotea molungtad og gatosan ka tuig aron dunay bag-ong stalactites o stalagmites nga mabuhi.
Sa paglibot sa langob, nisugat sa Superbalita team ang Philippine tarantula diha sa yuta, dunay crickets, pseudo-wave scorpions, huntsman spider, glowworms, pipila ka kabog ug tuko nga may itlog.
Way nagpakita nga sawa o bitin sa langob.
Sa di pa maabot ang kinatumyan sa langob o dead end, gitudlo ni Timotea ang usa ka dako nga bato nga may porma nga sama sa usa ka dako nga agila nga mibuklad sa iyang mga pako, dinhi gikuha ang pangan nga Eagle’s Cave.
Si Timotea nidugang nga ang langob nagsilbi nga dangpanan sa karaang mga tawo niadtong Ikaduhang Gubat sa kalibutan hinungdan nga gitawag usab kini og Dingayop Cave.
Sa ordinansa nga gipalabang sa konseho sa miaging buwan, P30 ang environmental fee sa matag tawo nga mosud sa langob sud sa 30 minutos samtang P300 ang bayad sa usa ka guide alang sa lima ka tawo (maximum).
Bukas kini gikan sa alas 8 sa buntag hangtod alas 3 sa hapon.
Si Caruz nidugang wala pa mapatuman ang ordinansa kay nag-ung-ong pa ang pagpalit sa lungsod og kahimanan nga gamiton sa mga turista nga mosud sa cave sama sa helmet o hard hat, headlamp, boots, gloves, ug flashlight.
Unsaon pag-adto:
Gikan sa Cebu South Bus Terminal, sakay og bus paingon sa Dalaguete ug plite og P120 (aircon) ug P110 (non-aircon). Gikan sa sentro sa lungsod, sakay og habalhabal, P50 ang plite.
Angay buhaton
u25cf Pagsul-ob og helmet o hard hat, headlamp, boots, gloves, ug pagdala og flashlight
● Pagdala og tubig ug pagkaon.
● Ayaw hikapa ang mga bato sud sa langob
● Ayaw pagpasagad og labay sa imong basura
● Obserbahi ang kahilom sud sa langob