DUHA ka mga grupo sa Sugbo ang nipadayag og suporta sa pagpaumento sa plitehan sa mga public utility jeepney (PUJ).
Kagahapon, ang Alyansa Sa Nagkahiusang Drivers-Operators Alang sa Reporma (Andar) ug Cebu Labor Coalition (Celac) niduso og manifestation papers sa buhatan sa Land Transportation Franchising and Regulatory Board (LTFRB) 7 nga nagpadayag sa ilang pagpaluyo sa P1.50 nga gipangayo nga usbaw sa Basak Lapu-Lapu City Jeepney Operators and Drives Association Inc. (Balacjoda).
Kini pirmado ni Metudio Belarmino Jr., tigpamaba sa Celac; ug Armando De Gracia, presidente; Joselito Nadera, bise presidente sa habagatan ug Romeo Armamento, bise presidente sa amihanan sa habig sa Andar.
Managsama og mga baruganan ang duha ka grupo nga panahon na umentohan ang minimum nga plitehan sa mga PUJ human giusbawan og P13 ang minimum nga suhulan sa mga mamumuo sa rehiyon niadtong Marso 10, 2017.
Dugang sa Andar ug Celac nga giaprobahan na sa LTFRB ang P8 nga minimum nga plitehan sa mga PUJ sa mga rehiyon 3 ug 4.
Ang Celac, sa giduso nga dokumento, namahayag nga giumentohan na usab sa LTFRB ang plitehan sa mga taxi sa nasod niadtong Miyerkules.
Ang duha ka grupo namahayag ang plitehan sa rehiyon 7 maoy labing ubos sa tibuok nasod.
Ilang gipunto nga way basehanan ang mga nisupak sa gipangayo nga P1.50 nga umento sa plitehan sa Balacjoda ug P1 sa Cebu Integrated Transport Services Multi-Purpose Cooperative (Citrasco).
Si LTFRB 7 Director Ahmed Cuizon nagkanayon nga kagahapon ra ang gihatag nga tagal alang sa pagduso og position papers kon supak o dili sa pag-usbaw sa plitehan sa PUJ.
Karong sunod semana, iduso na sa LTFRB 7 ngadto sa nasudnong buhatan ang nahipos nga data, mga dokumento ug sentimento atol sa public hearing.