SECTIONS
Monday July 16, 2018

Kumander sa MNLF naghupot og daghang armas gidakop

TACURONG CITY - Usa ka kumander sa Moro National Liberation Front (MNLF) ang nadakpan sa mga awtoridad gumikan sa paghupot og daghang mga armas.

Nasikop ang kumander alas 4:20 sa hapon nidtong Miyerkules sa probinsiya sa Sultan Kudarat.

Giila ang suspek nga mao si Gary Dalinding Nor, alyas Kumander Nor ug kagawad sa Barangay Kapaya, Bagumbayan, Sultan Kudarat.

Gibutyag ni Sultan Kudarat Police Provincial Office director, SSupt. Raul Supiter nga gironda sa mga pulis ang pinuy-anan ni Nor, uban ang militar base sa search warrant nga giisyu sa korte.

Nakuha sa balay ni Kumander Nor ang mga tag-as nga matang sa armas ug mga buhing bala.

Giangkon sab ni Nor nga siya ang nanag-iya sa mga armas ug legal kini gumikan siya sakop sa MNLF.

Dugang pangatarungan sa suspek nga ang mga armas ilang gigamit sa barangay batok sa pagpanghasi sa mga miyembro sa New People's Army (NPA).

Apan dunay mireklamo ngadto sa suspek nga kung makainom kini magpabuto sa iyang armas nga hugtanon sab nga gipanghimakak niini.

Gibalhog si Nor sa prisohan sa Bagumbayan Municipal Police Station ug gitakda nga pasakaan og tukmang kaso.


VIEW COMMENTS