Mongaya: Dino ug Yolanda housing

GITAHO sa usa ka broad­sheet sa kaulohan ug laing mantalaan dinhi sa Sugbo nga dunay mga biktima sa bagyong Yolanda nga nireklamo diay batok kang Presidential Assistant for the Visayas Mike Dino.

Ang maong reklamo gipadala ngadto sa Malakanyang.

Si Dino ang gitahasan ni Presidente Rodrigo Roa Duterte nga moateman sa mga biktima sa bagyong Yolanda apan human sa tulo ka tuig ubos sa administrasyon ni PNoy, wala gihapoy kabalhinan.

Kining paghatag ni Presidente Duterte sa maong tahas nahitabo sa miagi pang Nobiyembre 2016 ug nagpabelib ang Dino nga duna gyuy nahitabo.

Apan nabonggo si Dino dihang dunay gihimong House inquiry kabahin sa kahimtang sa Yolanda victims mga usa ka tuig ubos sa liderato ni Digong.

Karon, gikataho nga duna gyuy nireklamo batok kaniya.

Kahibulongan lang kay hilom kaayo ang iyang kampo nga mahilig man unta kini sila sa mga press release. Natuk-an?

Tingale, paagi kining dili pagtubag aron di kaayo mahisgutan ang maong hitabo ug di na lang motaho ang ubang mga mantalaan dinhi sa Sugbo.

Apan, kahibudngan lang gyud hinuon kon ang maong reklamo di itaho sa mga mantalaan dinhi sa Syudad sa Sugbo kay ang Dino usa man sa labing dako nga opisyal sa administrasyon dinhi sa Visayas.

Ang laing dakong opisyal mao man si Secretary Adi Sitoy.

Kon ato gyung tukion, di man lang kutob kang Presidente Duterte ang angayan niyang esplikaran. Angayan man sab siyang moesplikar sa mga taga Visayas ug mahitabo lang kini pinaagi sa pag-atubang sa mga sakop sa media ug pag-isyu og pamahayag.

Di lang una ko mokomentaryo kay mas gusto kong mobasa una sa maong reklamo ug sa tubag ni Dino.

Lihok Suporta

Napakita sa mga tigsuporta ni Presidente Duterte dinhi sa Sugbo ang wala molubad ang pagpaluyo bisan pa man sa kadaghang kontrobersiya kabahin sa presidente.

Mahinungdanon alang ka­na­ko nga nahitabo kini dinhi sa Sugbo ug mga kadagkoan sa Kilusang Pagbabago ug sa Office for Participatory Gover­nance nianhi gyud sa atua alang sa maong kalihokan.

Atong nadunggan nga ma­sundan kining maong kalihokan sa mas dako pang mobili­sasyon didto sa Davao.

Atong nasabtan nga ingon niini ang gipakitang suporta sa mga Sugboanon kay mas nag-una dinhi ang pagpakanaog sa giingong participatory governance. Dinhi sa Visayas sab ang pagpakanaog sa social development agenda sa kagamhanan. (@anol_cebu sa Twitter)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph