PATAY ang usa ka 41-anyos nga lalake human nadat-ugan og dakong bato atol sa pagdahili sa yuta sa Sitio Back GMA, Barangay Apas dakbayan sa Sugbo kagabii.
Naila ang biktima nga si Joel Brobo, construction worker kinsa kasamtangan nga aduna'y gitrabaho nga balay sa dapit.
Pasado alas 6:00 sa gabii na dihang niresponde ang personnel sa Bureau of Fire Protection (BFP) Search and Rescue Unit ug Emergency Response Unit Foundation (ERUF) aron makuha ang biktima.
Sa Facebook post ni Nagiel Bañacia, pangu sa Cebu City Distaster Risk Reduction and Management Office (CCDRRMO), nasayran alas 6:40 sa gabii dihang gisuwayan pa og retrieve si Brobo.
Matod ni Bañacia nga paingon na unta mopauli si Brobo sa lungsod sa Tabogon, ug nanghimasa kini dihang nidahili ang yuta.
Gihulagway nga na-sandwich kini sa plywood ug sa bato nga nidat-og niini.
Dihang gidala kini sa rescue team sa tambalanan, wala na kini nagginhgawa ug gideklarar kini nga dead- on-arrival.