KANIADTO kung mokuha'g kursong bokasyon sa panudlo giingong sama lang nga nagtukod ka'g lawak sa langit, labi na kung ang imong panudloan human sa imong pagtuon, mao kadtong mga children with special needs.
Ang pagpanudlo usa ka makapainubsanon ug makapabayaw nga kasinatian nga daw gihatagan ka og gahum sa paghulma sa usa ka tawo kung unsay gusto nimo alang kanila.
Alang kang Ma'am Lorilie Eran-Quijano, usa ka Department of Education (DepEd)-Agila 2017 awardee for Most Outstanding Sped Teacher, di lamang ang paghikap sa usa ka magtutudlo ngadto sa kinabuhi sa ilang mga estudyante, apan naa pa gyuy mipaluyo niini.
Sa iyang kasinatian, ang iyang mga estudyante ang mitandog ug mikambiyo sa iyang kinabuhi, gikan sa mga panahon nga iyang nakauban ang iyang mga tinun-an nga nagkinahanglan og espesyal nga panginahanglan.
Natawo siya sa Malaybalay, Bukidnon sa iyang mga ginikanan nga sila Vicente Bacting Eran Sr. ug Maria Nancy Buenaflor Palencia (kinsa pulos patayna), ug siya naminyo sa linghod pa ang pangedaron.
Nakasinati siya sa kalisud human siya sayong naminyo, nga maoy usa sa mga hinungdan nga nadugay ang iyang pag-graduate sa kolehiyo.
"Putol-putol akong pag-eskwela sa una," nahinumdoman niya diin ang iyang sitwasyon maoy nakapadasig kaniya sa paghuman sa iyang pagtuon diin tuig 1999 migradwar siya sa Bukidnon State University sa Compostela Valley province.
Iya sab nga nakuha ang graduate diploma sa Special Education (Sped) sa University of Southeastern Philippines sa Davao City uban sa tabang sa scholarship gikan sa Department of Education - Resources for the Blind, Inc. (RBI) nga nahuman tuig 2013.
"But the most important thing that challenged me to be a teacher is the passion to teach and care for these (special needs) children," sulti niya.
Sa kasamtangan, ang atong bida naggunit og mga tinun-an nga visually impaired, cerebral palsy ug intellectually-disabled learners.
Siya sab ang Sped, Campus Journalism ug English District coordinator sa Deped's Compostela District, Division of Compostela Valley.
Sa miaging 2014, iyang nahuman ang Master's Degree in Teaching Special Education didto sa Southwestern University sa Cebu City.
Di suma pa sayon nga tahas ang panudlo, diin gikinahanglan suma pa ang kinasingkasing nga pagtudlo sa mga bata labi na kadtong mga tinun-an nga nagkinahanglan og espesyal nga panginahanglan.
Nagkinahanglan suma pa og "special effort" aron makita ang kasingkasing diin sa iyang kasinatian, ang iyang mga tinun-an ang naghatag kaniya sa kasingkasing nga mahimo siyang usa sa mga nahimong most outstanding teacher.
Dugang pa, nga ang pasyon sa pagtudlo, ang pasensiya, ug ang pagkamalahutayon sa pagsabot sa mga bata maoy makapadasig kaniya sa pag-atubang sa mga tawo ug pag-establisar og mga koneksyon nga maoy hinungdan nga nakita ang kalidad sa iyang gipili ug gisudlan nga propesyon.
Tungod niini, niadtong Oktubre 2 lang gipasidunggan siya sa DepEd-Davao Region gumikan sa moang kontribusyon.
"The more I'll aspire to become the best teacher to my students, because I care for them and I love them as if they were my own," pagpaambit sa atong bida.
Kanimo, Ma'am Lorilie, saludo kami nimo!