GILUNGGOAN og ulo, giputlan og tiil ug kamot ang usa ka 25-anyos nga babaye sa iyang kapuyo sa Sitio Libo, Barangay Tayud, lungsod sa Consolacion kagahapon sa buntag.
Base sa pakisusi sa kapulisan, nahibaw-an nga bag-ong nakagawas sa rehabilitation center ang suspek nga si Dominic Pahugot, 27.
Patay usab kini human napusilan sa kapulisan dihang nisuway pagtigbas sa mga operatiba nga niresponde sa panghitabo dala ang duha ka sundang.
"Nag-attempt siya na tatagain ulit yung kapulisan natin," matod sa hepe sa Consolacion nga si PSupt. Mina Domingo.
Nasayran nga base sa imbestigasyon sa kapulisan alas 6:00 sa buntag kagahapon dihang nag-away ang magtiayon.
Alang sa mga silingan, normal lang kini nga panag-away sa magtiayon apan wala sila magdahom nga moresulta diay kadto sa maduguon nga panghitabo.
Ang giputlan og ulo naila nga si Lovely Jane Quiño, kapuyo ni Pahugot.
Dugang ni Domingo nga duha ka sundang ang gibitbit sa suspetsado dihang naabtan kini sa pulis sa baybayon sa maong barangay, kinsa nisuway pag-ikyas.
Anaa sa pultahan sa may kusina naglingkod ang lawas ni Quiño nga wala na'y ulo, tiil ug kamot.
Samtang siyam ka metros ang gilay-on, napalgan usab ang ulo niini.
Usa ang pagkaadik sa suspetsado sa drugas ang nag-unang rason nga nahimo niya kini sa iyang kapuyo.
Aduna'y duha ka anak ang magtiayon, usa ka 3-anyos ug laing usa ka tuig pa, kinsa anaa sulod sa panimalay.
Gipangutana sa kapulisan ang 3-anyos sa panghitabo ug tukma ang saysay niini sa nahitabo.
Ang silingan sa magtiayon nga si Teresita Tolentin, nibutyag sa tigbalita nga gadala usab diay og tubo si Pahugot nga mao'y gipuspos sa ulo sa biktima.
Gihulagway pa nila nga buotan si Quiño ug gikompirmar usab nila nga manuyopay ang biktima.
Usa ang apohan ni Pahugot kinsa silingan ra usab nila ang nangayo og pakitabang sa barangay diin ang barangay na ang nanawag og pulis aron moresponde sa dapit.
Base sa rekord sa kapulisan, aduna'y mga reklamo sa pagpanghasi na kaniadto batok sa suspetsado ug magdala kini og kasamok sa ilang dapit.