GISUBAY sa kapulisan sa Talomo ang giingong kidnapping sa Bago Aplaya, Davao City nga gisaysay sa usa ka 8-anyos nga bata kinsa giingong nakasibat sa maong pagpang-kidnap.
Sumala ni Chief Inspector Oliver Navales nga outgoing station commander sa Talomo Police Station nga ilaha pang subayon kung kidnapping ba ang nahitabo.
"Tan-awon pa nato ni unsa ka tinuod ang maong hitabo, gipa-verify pa nato sa Women and Childrens' Protection Desk," sulti ni Navales pinaagi sa telepono kagahapon.
Giingon sab ni Navales nga wala silay nadawat nga susamang report apan ilaha gihapong subayon ang ilang area of responsibility aron masanta ang hitabo kung naa man.
Una niini, usa ka Facebook post ang gi-share sa Davao City Public Inquiry Page diin mabasa nga na-rescue sa mga barangay tanud sa Barangay Bago Aplaya ang usa ka 8-anyos nga batang lalaki, alas 12 sa tungang gabii, Dominggo, Oktubre 8.
Ang bata nagsaysay nga nakaikyas siya sa pangpang-kidnap sa mga kidnaper diin gisulod siya sa usa ka kolor itom nga sakyanan ug sa sulod dunay duha ka mga bata, lalaki ug babaye.
Sa post, gibutang ang pangalan sa 8-anyos kinsa giingong anaa pa sa pagka-trauma human na-rescue sa mga tanod.
Usa ka concerned citizen ang nag-report sa mga tanod nga dunay bata nga mitago ilawom sa trak sa Gulfview hinungdan nga gipanubayan sa mga tanod ug na-rescue kini.
Sa pinakaulahing kalamboan sa istorya, gibutyag ni Navales nga nailhan ang maong bata sa barangay sa pagkalaagan niini.
Dugang ni Navales nga sukad nga namatay na ang mga ginikanan sa bata mipuyo nalang kini sa nag-adopt kaniya.