NIKUSOG ang taligsik hangtod nga makabasa na gyud sa lawas ang ulan apan wala nanagan ang bagang duot nga nitambong sa Lihok Suporta sa miaging Sabado diha sa Plaza Independencia.
Human sa pagkanta sa Nasudnong Awit, nisaka ko sa stage aron makita ang kabag-on sa mga nanambong aron mopadayag sa ilang pagsuporta kang Presidente Rodrigo Roa Duterte.
Ug nanglimbawot akong balhibo dihang nakita nako ang kadaghanon bisan pa man sa ulan. Nagtuo gyud ko nga nakuha nila ang target nga 15 mil. Mao to nga ako kining gikuhaan og mga hulagway nga akong gi-post sa Facebook.
Hinuon, gisultihan ko pagkataudtaud ni Atty. Rex Fernandez nga 10 mil ang naabot sa Plaza Independencia kay wala modayon ang dakong delegasyon nga nagmartsa gikan sa Barangay Quiot tungod sa sunog sa maong dapit.
Mao nga nakugang ko nga giingnan sa atong mga kauban sa media nga nag-cover nga usa ka pulis sa Waterfront niingon nga 1,000 lang ang nanambong.
Sukad pa kaniadtong dekada 80 ko magtambongan og lain-laing rali ug duna na kitay ideya sa kadaghanon inig tan-aw nato.
Apan nasurpresa ko niining polisa nga si PInsp. Jovito Labra sa Waterfront Police Station kay klarong di makamao moihap. Angay ipabalik og schooling sugod sa Kinder 1 section 8.
Hinuon, basin og naanad ang maong pulis nga mopaubos sa iyang estimate kon mga Walhon ang rali. Mao nga bisan og pro-adminitration kining maong rali, wa giang-ang. Ang 10 mil, iyang gihimong usa ka libo. Tuod man, gigamit gyud dayon sa kaatbang sa administrasyon.
Wa man koy paki kon gamay ba o daghan ang turnout. Ang ako lang kay mosulti unta sa tinuod. Kana kon makamao moihap. Basin og 1,000 ra sab gyud ang iyang makayag ihap. Tawn sab.
Dali ra ba gyud nga gi-post ang maong numero sa usa ka mantalaan nga wala na mangutana sa habig sa mga organizer. Nahibung ko kay baga man kaayo ang mga hulagway nga nakuha sa mga press photographer ug gani napatik man kini.
Gani, duha ka editor sa lain-laing mga mantalaan nangatawa man sa giingong 1,000 human nakita nila ang mga hulagway.
Matod pa ni Jesse Bacon, kanhi editor sa usa ka mantalaan dinhi sa Sugbo, a picture paints a thousand words ug ang mga hulagway nagpakita nga sobra gyud sa 1,000 ang turnout. Masabtan hinuon ang reporter kay bag-o pa man kini.
Bisan pa man, dali kaayong nakasaway ginamit ang maong sayop nga ihap ang mga nangasuya sa maong mobilisasyon.
Maayo na lang kay nakakuha ko og mga hulagway samtang naa ko sa stage kay lagi nikusog ang ulan. Sa mga interesado motan-aw sa maong hulagway, naa kini sa akong Facebook timeline ug sa Maghisgot Kitag Politika Bay.
(@anol_cebu sa Twitter)