NAKAHILAK sa kasakit si Crisanto Cababat dihang gibugalbugalan sa mga tawo gumikan sa iyang pagka manananggot.
Ang kaniadto gitawag og “Boy Tuba” karon, usa na ka tinahod nga tigpatuman sa balaod ug tigpanalipod sa mga tawo batok sa dautan.
Si Cris, nagranggo og police officer 1 ug maoy in-charge sa Police Community Relations sa Badian Police Station.
Ang kalamposan ni Cris sama ka habog sa mga punoan sa lubi nga iyang gikatkat, malisod, apan uban sa determinasyon, paningkamot ug kugi, iyang nakab-ot.
Bata pa lang kini, daghan na siya og nakat-unan nga trabaho.
Aron makasuporta sa iyang pamilya ug pagtuon sa high school hangtod sa kolehiyo, siya nananggot, nahimong katabang sa balay, nagmasahista, nag-working student ug uban pa.
Ang iyang amahan nga si Hilarion, 65, ug inahan nga si Petra, 64, pulos mga mag-uuma sa lungsod sa Alcantara. Walo sila ka managsuon ug siya ang ikalima.
Ang ilang inahan ug iyang igsuon magpaobra sa mga kaila pinaagi sa pagpamaol.
Si Cris nagtungha pa lang sa elementarya, paubanon na sa iyahang inahan sa pagpamaligya og banana cue ug mga sud-an.
Kaadlawon pa lang, sa dili pa siya moadto sa eskwelahan, Lawaan Elementary School, mangabo una siya og tubig ug mangumpay ug manugway sa ilang kahayupan.
Pagtungtong niya og 1st year high school, nakat-on siya sa pagpananggot gikan sa iyang mga igsuon ug silingan.
Alas 4 pa lang sa kaadlawon, nagmata na si Cris ug naghimo sa mga buluhaton sa balay human mananggot.
Di mominos 11 ka mga punoan sa lubi ang iyang katkaton ug sangguton, ang uban gibanabanang 50 ka tiil hangtod 60 ka tiil ang gihabugon.
Siya nagbuhat niini matag adlaw, kaadlawon ug gabii ug makakuha siya og 3 ngadto sa 5 ka mga gallon sa tuba.
Sa usa ka semana, siya mokita og P300 ngadto sa P400 sa pagpamaligya og tuba ug kini iyang ipalit og pagkaon sa ilang pamilya.
Si Cris bugalbugalan sa ubang mga tawo labi na kon magkahugaw ang iyang sinina kon moadto sa eskwelahan, Alcantara National High School, diin siya nagtungha sa high school.
“Nakahilak ko kay sakit, pait kaayo. Pero ako nang gihimo nga inspirasyon. Bisan kabos mi, naningkamot gyud ko,” pahayag niini.
Pagtungtong niya sa kolehiyo, gipatungha siya sa iyang maguwang nga babaye sa kursong Information Technology sa Dumaguete City apan human sa usa ka semester, niundang kini og eskwela.
Apan nitrabaho na siya sa Nuat Thai Massage and Spa sa Dumaguete.
Pagbalik niini sa Sugbo, dihang first year second semester na kini, si Cris nadawat isip working student sa University of Cebu main campus, siyudad sa Sugbo ug nagtungha sa kursong Bachelor of Science in Criminology.
Bisan kon nag-eskwela, gipadayon ni Cris ang iyang pagtrabaho.
Sa adlawan ang iyang klase ug sud sa lima ka oras mo-duty kini isip working student diin managinot siya og tuon.
Sa gabii, mo-duty siya sa Nuat Thai sud sa upat ka oras. Usahay lima ka oras na lang ang iyang pagkatulog.
Aron malibre ang iyang pagpuyo sa siyudad sa Sugbo, nangalagad si Cris isip katabang sa panimalay sa tag-iya sa Nuat Thai nga si Kenneth Carredo diin motabang kini sa buluhaton sa balay.
Ang iyang matigom ug sweldo sa trabaho maoy iyang allowance, gipalit og libro, gigasto sa mga project sa tunghaan ug gipaambit usab ngadto sa iyang tulo ka mga manghod ug duha ka pag-umangkon nga mga babaye sa ilang panginahanglanon.
Niadtong 2012, si Cris nakapasar sa licensure examination sa Criminology hangtod nahimong pulis, una siyang nadestino sa Alicia, Bohol sa wala pa gibalhin sa lainlaing units sa Police Regional Office (PRO) 7.
Ang iyang kalamposan nagmatuod nga bisan sa kakabos, ikaw molampos.
“Dili imposible kon maningkamot ka uban sa pag-ampo sa Ginuo,” matod ni Cris sa Superbalita Cebu.