Dalaw gisuspenso

INAY mga piniriso lang sa duha ka selda, ang tanang mga bilanggo na sa Cebu Provincial Detention and Rehabilitation Center ((CPDRC) ang gidid-an una ma­kadawat og mga dalaw.

Si Gobernador Hilario Davide III nakadawat og impormasyon nga duna gihapoy mga piniriso ang padayon naghupot og mga cellphone ug padayon dunay contact sa gawas sa prisohan.

Kini human si Leodegreco “Greco” Sanchez nasakpan nga ni-text sa iyang maguwang nga si kanhi bokal Grecilda “Gigi” Sanchez niadtong Dominggo sa gabii.

Ang pagtinir og cellphones ug ubang kontrabando ang hugot nga gidili sa CPDRC.

Sa miaging semana, gisuspenso sa gobernador ang dalaw sa mga piniriso sa mga selda 26 ug 98 human duha ka mga pakite sa gituohang shabu ang nakuha gikan sa mga higdaanan nila ni Jerryfer Pe­regrino ug Russel Calida nga nag-ukopar sa maong selda.

Si Gigi mismo nisumbong ni Davide kagahapon nga nag-text niya ang iyang manghod nga si Greco. Labing uwahing text niini, alas 11 sa gabii niadtong Dominggo.

Si Roberto “Bobby” Legaspi, pangu sa Civil Security Unit sa Kapitolyo ug miyembro sa CPDRC Task Force, ni­butyag nga sila si Joavan Fer­nandez, Greco ug ubang bi­langgo gibu­tang og isolation cell human masakpi nga nigamit og cellphones.

Sa miaging semana pa gibutang og isolation cell ang du­ha, apan si Greco padayon nga naka-text sa gawas.

Ang pagkasulod ni Greco ug Joavan maoy silot nga gipatuman sa mga lider sa mga bilanggo pinasikad sa mga lagda nga ilang gitamod alang niadtong mga piniriso nga makasala.