ANG maguwang nga lalake ni Dominic Pahugot, kinsa nilunggo sa ulo sa iyang kapuyo nga si Lovely Jane Quiño, nadala sa police station human naghuramentado sa sityo Libo, Brgy. Tayud, lungsod sa Consolacion niadtong alas 7 sa sa gabii sa Dominggo.
Si PO2 Socrates Borinaga, imbestigador, niingon nga ilang gibutang si Esboy, tawag sa suspek sa iyang mga kabanay, sa bilanggoan tipon sa 33 ka mga piniriso human kini nila masikop.
Sama sa iyang igsuon, si Esboy nag-antos sa sakit sa pangutok tungod sa pagkagumon sa drugas.
“Nanigbas na siya sa mga pultahan sa balay sa iyang mga silingan,” matod ni Borinaga sa interbyu sa telepuno sa Sun.Star Cebu.
Siya niingon nga nakigtambayayon na sila sa municipal social welfare and development office.
Hayan ilang ipadala si Esboy sa psychiatric ward sa Vicente Sotto Memorial Medical Center sa Siyudad sa Sugbo.
Si Borinaga niingon nga ang social welfare workers nipahigayon og stress debriefing sa 4-anyos nga babayeng anak ni Quiño nga bugtong nakasakti sa pagpatay sa iyang inahan.
“Usahay motubag ang bata, usahay dili. Na-trauma gyod to siya sa panghitabo,” siya niingon.
Nianang buntag sa Dominggo, gitigbas ni Dominic si Quiño human niya pusposi og tubi taliwa sa ilang panag-away una pa niya lunggoi sa ulo.
Napatay si Dominic sa mga pulis human kini niatake kanila gamit ang sundang.
Way pasilidad
Way igong pasilidad ang Center for Behavioral Science sa Vicente Sotto Memorial Medical Center (VSMMC) sa pagpahimutang sa mga pasyente nga dunay kakulian sa pangisip.
Si Dr. Rene Obra, pangu sa CBS sa VSMMC, niangkon niini human dunay mga nangutana kon nganong gipagawas ang usa sa mga pasyente sa ospital nga si Dominic Pahugot bisan kon giingong wala pa kini hingpit maayo.
Ang doktor namahayag sa kasamtangan, 60 ka mga higdaanan ang kapasidad sa ilang pasilidad apan niabot na og kapin sa 100 ang ilang mga pasyente.
Siya nidugang nga napaubos na sa pre-bidding sa miaging semana ang pagpatukod nila og bag-ong psychiatric building diin dugang 60 ngadto sa 80 ka mga higdaanan ang mapuno.
Si Obra nipasabot manambal ug makahatag sila og tambal sa mga tawo nga magpakonsulta sa ilang buhatan apan tungod kay limitado ra ang ilang lugar, maglisod na sila pagdawat og dugang mga pasyente.
Iyang giklaro ang pagtambal sa tawo nga sama ni Pahugot nga nagumon sa shabu kay dugay ug dili sayon nga molungtad og mga buwan o mga tuig.
Matod niya sama sa diabetes ug cancer way tambal alang sa hingpit nga kaayohan sa mga pasyente nga dunay kakulian sa pangisip.
“Ang atong paghatag og tambal para mapataas lang nato ang functionality sa patient sa iyang daily routine, trabaho, unsay personal needs, nga dili kaayo siya problema sa iyang mga kauban sa panimalay,” pagpasabot sa doktor. (Dugang taho sa Sun.Star Cebu)