NAUYUNAN sa mga kapitan ug ubang mga ahensya sa gobyerno nga kasamtangang ihunong una ang mga pagpangtapot og sticker ug poster nga drug-free house ug shame campaign sa pipila ka mga lugar sa dakbayan sa Sugbo ug Lapu-Lapu City.
Kini mao ang nasabutan atol sa inter-agency meeting nga gipatawag sa Commission on Human Rights (CHR) 7 kagahapon.
Nauyonan usab nga inay ang barangay maoy mohimo sa kampanya, pribadong mga organisasyon ug tagbalay na ang angay mohimo og lakang.
Human sa pipila ka mga nahimong tinubagay, pagpaklaro sa ilang mga tinguha ug pagpasabot sa CHR sa ilang gihulagway nga nayatakang tawhanong katungod, niuyon usab ang pipila ka mga barangay captain sa dakbayan sa Sugbo ug si Pajo barangay captain Junard “Ahong” Chan nga nitambong sa maong meeting.
Lakip nga nitambong sila si Ermita barangay captain Felicisimo “Imuk” Rupinta, Association of Barangay Councils (ABC) President ug Tisa Barangay captain Philip Zafra, nagkadaiyang kapitan sa dakbayan sa Sugbo ug mga representante sa nagkadaiyang ahensiya lakip ang Interior and Local Government, Philippine Drug Enforcement Agency (PDEA 7), Cebu Office for Substance Abuse Prevention (Cosap) ug uban pa.
Gipahinumdom sa CHR 7 nga sundon lang sa mga kagamhanan sa barangay ang nalatid sa Barangay Anti-Drug Abuse Council (BADAC) nga mao ang agresibong pagtabang sa pagkuha sa impormasyon kon kinsa kining nalambigit sa ginadiling drugas ug paghatag niini ngadto sa mga law enforcer.
Sa gihimong katin-awan sa CHR, mamahimo ra nga ang tagbalay o pribadong organisasyon ang mopatapot og mga sticker isip suporta batok sa ginadiling drugas tungod kay kini ka freedom of expression.
Usa sa sugyot ni Binaliw barangay captain Wilson Bacor nga nauyunan sa CHR kining aduna’y suwat nga “This Family Supports A Drug Free Community, apan kinahanglan nga di gikan sa gobyerno ang bayad sa pagpahimo niini.
Nakab-ot usab nila nga kasabutan nga mismo ang CHR 7 na ang mohimo sa text alang sa info-material.
Sa sunod semana, gikatakdang magtagbo sila pag-usab alang na sa kongkretong programa.
Apan alang kang Cebu City Mayor Tomas Osmeña, di makahilabot ug di makapahunong ang CHR sa gihimo sa Barangay Ermita labi na ang pagpapilit og “drug free home” ngadto sa mga balay nga kaniadto mga drug den.
Matod ni Osmeña nga di pagpakauwaw ang gihimo sa Ermita inay paghatag og kasayuran sa katawhan may labot sa kalambuan sa barangay diin nabantog nga grabe ang illegal drugs. (dugang taho ni PAC)