Aga andam na makigtigi sa leading man roles
PILA lang ka mga tawo ang gihatagan og gasa sa kahitas-an nga magpabiling batan-on tan-awon ang dagway. Usa niini si Aga Muhlach.
Hinoon, katapusan nakong pagkakita niya sa telebisyon, medyo nitambok siya ug nagpatubo og bungot. Nahiligan niya ang pagdula og skim boarding niadtong higayona.
Karong bag-o lang, nilingkod siya isip hurado sa Ms. Q&A sa It’s Showtime ug nakadayeg ko kay niubos ang iyang timbang ug nibalik ang iyang batan-ong panagway.
Angay lang gyud aron magtigi sila ni Ian Veneracion (lain usab nga gigasahan ug batan-ong panagway bisan edaran na) sa mga papel isip leading man sa telebisyon ug pelikula.
Usa si Aga sa mga anak ni Ronaldo Valdez sa pelikulang Seven Sundays diin kauban niya sila si Dingdong Dantes, Cristine Reyes, Enrique Gil ug uban pa. Gihimo sa Star Cinema ubos sa direksyon ni Cathy Garcia-Molina.
Tan-awon ko ni karong weekend aron masuta kinsa ang labing maayong modalag drama nila ni Aga, Dingdong ug Enrique isip magsuon.
u25cf ● ●
Nakaagik-ik ko sa Ms. Q&A adtong nag-judge si Aga. Unsaon nga ang tubag sa tulo ka kandidata sa pangutanang ‘kinsa ang partner ni Michael Jackson sa pagsulat sa kantang We Are The World nga may first name nga Lionel’ gitubag man og Lea de Lima, Lionel Rhymes ug Lionel Jackson?
Pastilan! Di man sab mga bugo. Wa lang gyuy mga hanaw. Pero nalingaw ko.
u25cf ● ●
Ginindotan ko sa Last Night nila ni Piolo Pascual ug Toni Gonzaga. Lahi siya sa ubang pelikula nga magkadayon gyud ang mga bida.
Nakadayeg ko ni Bela Padilla nga maoy nagsulat sa sugilanon. Mas nitubo hinoon ang akong pangandoy nga makahimog script bisan usa lang.
Kon madaghan, labing maayo. Morag parehas mig tumong sa akong higala ug kauban sa buhat nga taguon ta lang sa ngalang Dodong Morallo.
u25cf ● ●
Nagkaduol na gyud ang Pasko ug daghan na kaayong mga adorno ang mga mall ug department stores nga nagsidlaksidlak ang mga gagmayng bombilya. Sige na sab og tokar ang mga Christmas songs.
Pero wa pa gihapon ko matarog sa akong gihimong kaugalingong lagda nga sa Disyembre 1 na ko mopatokar og kanta sa Pasko ug motaud sa mga dayandayan sa balay.
Ikaduha, wa pa sab diay koy tauranan og adorno kay wa pa maporma ang akong balay. Hehe. Paet!