DINHI sa ato ang kisaw sa pulitika nagkainit na. Labi na sa mga dapit nga ang naglabayng elek­s­yon gihabolan sa dag­hang kontrobersiya labot sa isyu sa panikas.

Mga dapit nga dunay dugo nga nibanaw. Mga dapit nga ang salapi, goons ug panghudlat nagpasuwabe. 

Mga dapit diin kusog ang palit sa boto. Mao ning mga dapita nga ang kisaw sa pulitika karong panahona nag-umido. Nag-aso-aso. Sa laktod nibukal na ang kaldero sa pulitika.

Ambot kon nagtingganay pa ba kaha kining nipadayag na og intensiyon nga modagan. Ang uban baya ini nila mga paryente, kumpare sa bunyag ug kasal. Ang uban kauban kaniadto og partido.

Ang uban kauban sa mga kalihukan sa kapilya ug simbahan. Dunay nagka-classmate sa kinder, elementarya, high school ug kolehiyo. Apan tungod sa pulitika, tuyo nga gikalimtan ang ilang kasuod ug mosugot naman lang gani nga magpatay tungod sa mga isyu ug pasangil  sa panikas. Sa akong pagtuo gamay ra ni sila itandi sa mga politiko nga mapaubsanon ug dili gusto og gubot. Mas daghan kadtong  di gusto og samok. Daghan kanila ang nisalig sa mga hukmanan pagpangayo og hustisya sa mga kalapasan nga nahimo sa ilang kaatbang. Mao ni sila ang mga politiko nga di magpasulsol sa mga tawo nga gustong  magpasiugda og kagubot. Kon dunay problema modangop sa mga tinugyanan nga gitahasan  sa mga problema labot sa eleksyon. Sa ingon ini nga paagi malikayan ang pag-ulbo sa kagubot.

TONGGO ISLAND

Kalit-kalit nga biyahe ang akong nakuyogan gahapon. Ang destinasyon mao ang usa sa mga isla nga sakop sa lungsod sa Cordova. Kauban nako sila si JT Benz, Ralph Sevilla, Edison delos Angeles ug Yul Julia nga maoy tag-iya sa labing bag-o nga pump boat nga among gi-testing pagbiyahe padung sa Tonggo Island. Sa iyang gidak-on di problema ang pagpasa­kay gikan sa 20 ngadto sa 30 ka pasahero. Sugyot ni JT Benz nga ang ingon ini nga pump boat mahimo na kaayong inegosyo alang niadtong gusto nga magsuroy-suroy sa kadagatan sa dakbayan sa Sugbo.

BASURA

Sa maong biyahe, nakurat mi sa among nakita. Mga basura nga naglutawlutaw atubangan sa Trece Uno Island, ang kanhi Shell Island. Nagkadaiyang matang sa basura nga gidam-ok sa dagat. Ang pangutana ang maong talan-awon gahapon ra nitumaw didto o kada adlaw puno sa basura ang maong dapit.

Pag-abot namo sa Tonggo Island, mas grabe pa ang among nasaksihan, mga basura, kadaghanan plastik, ang namilit sa bakhawan. Subo ni nga talan-awon taliwala sa kampanya paglimpyo sa kadagatan batok sa mga dagmalan.