ANG pambato sa Barangay Tibungco ning dakbayan ang nanguna sa mga dance groups nga nakasud sa semis, subay sa elimination round alang sa Bangga sa Sayaw, Metro Davao Edition, niadtong Sabado ning Dakbayan sa Davao.
Ang Season Crew nga may siyam ka miyembro, mipabilib sa mga hurado sa ilang cool moves sa dance floor.
Di na sab bag-o ang grupo sa mga kompetisyon, tungod sukad sila natukod niadtong 2011, ubay-ubay na nga mga kompetisyon ang ilang giapilan.
Luyo sa Season Crew, nakasud sab sa top 4 nga moabante sa semi-finals round ang Kite, Crown ug 39 Blockz. Ang Neutral Mix, maoy na-eliminate kanila.
Ang kompetisyon giubanan sab sa mga hurado nga sila Jilbert M. Abenoja, Aris Dequit ug Mark Jason C. Calvelo.
Ang semi-finals himuon karong Hulyo 29 sa NCCC Mall of Maa, samtang finals karong Agosto 21 sa samang venue.