(Pasiuna: Kini ang atong apas sumpay sa suliran nga gipadangat kanato ni Ramona of Sta. Cruz, Davao del Sur mahitungod sa iyang suliran nga iyang inahan adunay Alzheimer’s disease)
DEAR Ramona of Sta. Cruz, Davao del Sur,
Og karon anaa na gyud kita sa atong katapusan nga paglayag niining maong sakit.
Sa niagi, atong gibiyaan ang pagtuki mahitungod sa mga tambal niining Alzheimer’s disease.
Ang lain pang mga pagtuon sa mga ilaga nagasugyot nga ang pagbakuna sa mga kahayupan sa maong protina nga makapaguwa sa amyloid mamahimo nga mohimo og reaksyon nga makapawagtang sa protina nga makapaguwa sa amyloid diha sa utok.
Gani, karon ang mga doktor nisugod na sa pagtuon sa pagbakuna sa mga tawo aron matino kung aduna ba kini susamang potensyal nga benepisyo nga makab-ot.
Daghan pa kaayo kita nga angay nga makat-onan. Apan, sa magkadugay nga mas masabtan sa mga siyentipiko ang sangkap sa kaliwat sa Alzheimer’s disease, ang papel sa protina nga makapaguwa sa amyloid ug sa protina alang maong sakit, ug sa mekanismo sa pagkalaya sa mga selula sa kaugatan, mas may posibilidad nga ang tambal mas maayo unyang moabot.
Adunay mga alternatibo nga tambal sa Alzheimer’s disease nga ginatun-an nga ginaingong makatabang sa pagpakgang sa maong sakit nilakip sa Green Tea, Virgin Coconut Oil, Gingko Biloba ug luyang dilaw.
Mga preliminaryo pa ang nahimong pagtuon sa maong mga hilba. Apan, dako ang panaad niini. Ampo lamang kita nga sa ugma damlag mohatag gayud kini ug mas maayong resulta.
Nakasabot ako sa imong kasakit ug kalisod sa pag-atiman sa pasyente nga adunay Alzheimer’s disease. Dili gayud kini tiaw. Nakasabot usab ako sa kahadlok nga tingali baya unya ug maig-an usab ikaw o mahitabo usab kini kanimo unya.
Mao nga sa pagkakaron pa lamang, mobuhat kita ug pamaagi nga mapakubsan ang atong kahigayunan niini – susama sa maayo nga estilo sa kinabuhi, paglikay sa mga pagkaon nga taas sa taba o kolesterol, pagpasingot kanunay, pagkanunayon nga paggamit sa utok ug pagyarok ug mga suplemento nga alang sa utok.
Unta nakatabang ako kanimo. Good luck!
Dr. Fritz
(Si Dr. Fritz Legarde Espedilla usa ka aesthetic dermatologist/surgeon ug clinical sexologist. Aduna usab siyay kahibalo ug training sa hypnotherapy ug sa Medical Acupuncture. Usa usab siya ka personalidad sa radyo (DXAB 1296) nga sobra na sa dekada nga nagadagan sa kahanginan ug autor sa iyang libro nga “Healthy is Sexy Secrets ni Dr. Fritz”. Alang sa inyong mga sulat-suliran, mamahimo kini ninyong ipadala sa Dear Dr. Fritz, c/o Sun.Star-Davao Publishing Inc., Ebro-Pelayo Building, Jacinto St., Davao City, (former Department of Foreign Affairs office), across Ateneo de Davao University and beside Holy Child School of Davao, o i-e-mail kini sa dokfritz@yahoo.com. Ang dili magpamantala dili matubag!)