Genoguin: Sayon ang pagdagan, problema kon modaug

ANG politika sa Pilipinas hilabihan kahugaw kon itandi sa kalihukang politika sa ubang nasud. Dili ikalimod nga hilabihan kasuod sa pamilyang Binay ug Aquino, bisan wala pay Edsa People Power.

Human sa people power, si kanhi Presidente Cory Aquino maoy nagtudlo ni Jejomar Binay isip officer-in-charge (OIC) mayor sa siyudad sa Makati.

Walay nagtuo nga mao kini karon ang dangatan sa ilang panagsuod.

Tama lang ang atong mabati kanunay nga sa politika, walay permamenteng amigo ug kaaway; ang permamente mao ang ilang interest. Hangtud lang sa tuig 1992 nag-uban ang Aquino ug Binay sa politika. Pagkawala ni Cory, nagbulag na sila sa dalan sa politika.

Sa presidential election sa 2010, kontra partido na sila Binay ug Aquino, busa dili gyud makapaabot si Vice President Binay nga siya ang dapigan sa presidente niining eleksiyuna bisan pa og kanunay taas ang iyang rating.

Magbayad si Aquino og utang kabubot-on kang Mar Roxas kay sa 2010 pa intawon ni siya nag-ambisyon nga mag-presidente, pero iyang gihatag ang kahigayunan ni Aquino kay humot siya niadtong panahona human mamatay ang iyang inahan sa sakit nga cancer.

Dili pud mabasol ni Binay kong si Mar Roxas ang kandidato sa presidente, tungod kay matinud-anon si Roxas sa iya.

Samtang gidabudabohan og kulata si Binay sa mga kaalyado ni President Noynoy -- imbestigasyon diri, imbestigasyon didto -- gi-aguwanta sa vice president ang tanang mga santako uban ang panghinaut nga labanan siya sa presidente, ug i-endorso nga maoy pambato sa 2016 eleksiyon, apan pakyas siya kay si Roxas pa gihapon ang paborito ni Aquino bisan layo ra sa presidential survey.

Karon nga nag-resayn na siya sa gabinete, iyaha na usab ang tanang higayon sa pagkulata batok sa administrasyon. Bahala'g below the belt, matud pa niya, walay sukod sa balus nga trabaho lang walang personalan.

Ang nakadaut lang, samtang nakalingkawas siya sa mga punching sa mga kaalyado ni Presidente Noy, kita na pod nga mga pobreng Pilipino ang gihimo niyang punching bag o bida sa iyang mga batikos, kay gipabayaan daw ang mga pobreng katawhan sa "manhid" nga administrasyon.

Lumang tugtugin na yan, Mr. Vice President? Sunog na nang istiloha sa pamolitika, bisa'g kinsay maglingkod ninyo sa Malakanyang, gutom gihapon ang abuton sa katawhang Pilipino. Ikaw ra ug ang politikong sakop sa imong pamilya ang mabulahan kon tua ka na sa Malakanyang.

Kon ang eleksiyon himuon karon, hayan si Mayor Duterte ug Grace Poe ang maglaban sa pagka presidente. Walay problema si Mayor Duterte kay kon kuwalipikasyon ang hisgutan, over qualified, tested and proven na, kon kasinati-an ang atong hisgutan.

Ang problema kon si Grace Poe, kay matud pa ni anhing comedian actor Dolphy, sayon ang pagdagan apan ang problema kon modaug. Unta dili pahimuslan ni Grace Poe ang kasikatan sa iyang pangalan, atong dawaton ang kamatuoran nga dili pwede magtimon sa usa ka barko ang usa ka tawo nga mao pa'y pagsakay og barko. Kinahanglan magtuon ka usa sa pagka-timunil, di ba?

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph