MAKALIBOG ang implementasyon sa K to 12 program kay kung ang Department of Education (DepEd) ang pangutan-on, moingon man nga andam na ang tanan, apan kung ang mga magbabalaod ang pasultihon -- di pa gyud andam.
Subli kining nahisgutan kay mao kini ang pahayag ni Pasig City Congressman Roman T. Romulo nga nahimong bisita ni Davao City Mayor Rodrigo Duterte sa iyang programang "Gikan sa Masa, Para sa Masa" kagahapon.
Sumala ni Romulo nga ila nang naistorya ang DepEd sa kakulangon sa lawak-saringan, P30 mil ka mga bag-ong magtutudlo og minilyon ka mga libro.
Kung tinuod nga andam na ang DepEd, suma ni Romulo, nganong hangtud karon wa pa may gi-hire nga mga magtutudlo?
Upat ka tuig na kining gipangandaman, apan hangtud karon daghan pa gihapon ang kulang. Ambot kung unsay hinungdan?
Tinuod nga hinay-hinay na nga mihangop ang katawhang Filipino sa K to 12 program, apan ang atong gipaabot nga paspasan sa DepEd ang paghatag solusyon sa mga suliran.
Ang nahitabo man god karon mao nga gibahin ang klase sa mga bata; dunay morning ug afternoon session. Sanglit kuwang ang magtutudlo ug klasrom, ilang gidasok ang daghang mga bata sa usa ka section.
Ang resulta, sa atong tan-aw, bisan K to 12 Program na -- di gihapon makab-ot ang de kalidad nga edukasyon tungod kay di man conducive sa pagtuon ang kahimtang sa mga bata.