MALAMPUSON sila Edrin "The Sting" Dapudong ug Lorenzo "Thunderbolt" Villanueva sa ilang tagsa ka away human mitala og knock-out nga kadaugan sa Boxing Revolution 3: No Guts No Glory niadtong Biyernes sa gabii.
Milabay si Dapudong og left hook sa lawas aron mapakirig sa sakit ang iyang kontra nga si Richard Garcia hangtud gihunong sa referee ang away sa 2:19 sa ikaduhang round.
Tungod niini, mas gipanindot sa taga-North Cotabato ang iyang rekord ngadto sa 31 daog.
"Wala ko nag-expect nga ma-knockout nako siya sa second round. Tan-aw man god nako ato kay mag-abot gyud mi ug 10 rounds. Pero plano na gyud namo nga atakehon gyud namo siya sa body ug sayo para ma-open na siya sa mga mosunod nga round," matod ni Dapudong atol sa interbyu human sa away.
Sa laing supporting event, wa gipadugay ni Villanueva ang iyang away diin gihuman lang niya kini sulod sa 34 segundos dihang gipatumba si Hagibis Quiñones sa unang round pinaagi sa duha ka kombinasyon nga sagunsong wala-tuo nga kumo.
Wa nakahuman sa pag-ihap ang referee dihang ang coach ni Quinones milabay na og towel isip surender.
Karon, duna nay rekord si Villanueva nga 29 daog.
Samtang, pakyas si Roland "Smooth Operator" Magbanua sa pagdaug dihang siya natumba sa ikaunom nga round, kontra kanhi Philippine Boxing Federation flyweight champ Rey Las Piñas.
Nagdomina na unta si Magbanua sulod sa lima ka round apan nakuwang iyang depensa human milabay og tuo nga kinumo si Piñas nga nakawingig sa nawong ni Roland.