SIYAM na ka munisipyo sa probinsiya sa Maguindanao ang gibaha sugod niadtong Biyernes.

Kini gilangkuban sa Datu Paglas, Rajah Buayan, Sultan Sabarongis, Pandag, Buluan, Mangudadatu, Datu Salibo, Montawal ug Datu Piang Maguindanao.

Matud ni Maguindanao Governor Esmael Mangudadatu nga minilyon na ang danyos sa pananom, kahayupan ug kabtangan nga gibanlas sa baha.

Ang libuan ka pamilya nga mihiklin gumikan sa baha temporaryo nga namuyo sa mga tulunghaan ug municipal gym.

Gibaha ang mga munisipyo sa Maguindanao gumikan sa nasinatiang grabeng pag-ulan, hinungdan nga miawas ang Allah River nga nagkonektar sa mga dagkong suba sa Sultan Kudarat ug South Cotabato.

Gawas sa Maguindanao, gibaha na sab ang pipila ka barangay sa North Cotabato.

Sila si Governor Mangudadatu ug Cotabato Governor Emmylou Taliño- Mendoza nagpaabot na og hinabang sa mga pamilya nga biktima sa baha.