GIANGKON ni Jahlil Okafor, ang higanteng no.3 overall pick sa Philadelphia 76ers sa bag-uhay lang nahuman nga National Basketball Association (NBA) Rookie Draft, nga usa siya ka fan sa kasamtangang MVP sa liga nga si pointguard Stephen Curry.

Matod ni Okafor nga nalingaw siya kon giunsa pag-agak ni Curry ang Golden State Warriors aron maangkon ang 2015 NBA title.

Apan alang kang Okafor, ang labing maayo agianan paingon sa kampiyunato pinaagi gihapon sa dagko ug tag-as nga mga magduduwa nga sama kaniya.

Mao kini hinungdan nga ang 6’11” nga produkto sa Duke malipayong nahisakop siya sa 76ers nga gilangkuban nang daan og tag-as nga mga magduduwa nga sila si Nerlens Noel ug Joel Embiid, kinsa adunay dakong potensyal.

Si Okafor usa sa lima ka mga magduduwa nga nakuha sa 76ers gikan sa NBA draft alang sa ilang intensyon nga palig-unon ang ilang puwersa.

“For as long as I remember, big men have dominated the NBA,” pasabot ni Okafor.

“People got a little excited because of what Steph Curry did — and he was fantastic.

But as long as I remember, big men have been dominating and the results have been championships.”

Si Okafor, kinsa nakadaog og usa ka national title sa Duke, nag-idolo sa dekalidad nga mga sentro nga parehong nakahakot og mga NBA titles nga sila si Tim Duncan sa San Antonio Spurs ug Hakeem Olajuwon sa Houston Rockets.

Daghang mga lihok nila ni Dundan ug Olajuwon ang gisundog ni Okafor.

“I’ve always been the tallest guy in my age group, which always made me go right down in the post,” dugang ni Okafor. “Around sixth or seventh grade, I fell in love with Tim Duncan and his all-around game. That’s when I started watching him. Then my father introduced me to Hakeem Olajuwon."