DAVAO CITY -- Gikumpirma sa Armed Forces of the Philippines (AFP) nga napatay sa mga Scout Rangers ang taas nga leader sa New People's Army (NPA) sa dakbayan.

Matud ni AFP Public Affairs Office chief Lieutenant Colonel Harold Cabunoc nga napatay si Leoncio Pitao, alyas Kumander Parago, sa Pulang Bagani Command 1 human ang engkuwentro tali sa militar ug rebeldeng NPA sa Purok 9, Barangay Panalum, Paquibato District, alas 2:30 kagahapon sa hapon.

Samtang gisuwat kining balita, padayong gisusi sa mga otoridad kung may kaubanan pa ang rebeldeng namatay sa maong pinusilay.

Sa maong katikaran, gidayeg ni outgoing AFP chief General Gregorio Pio Catapang Jr. sila Eastern Mindanao Command Chief Lieutenant General Aurelio Baladad ug 10th Infantry Division commander Major General Eduardo Año sa pag-neutralize kang Parago.

Subay sa maong report, gikumpirma ni Davao City Police Office spokesperson Milgrace Cajes Driz subay sa iyang gipadala nga spot report ning tigbalita.

Giingon sa spot report nga duna pay laing lima sa sakop sa NPA ang wa pa maila gawas kang Parago.

Nakuha sa posisyon ni Parago ug kaubanan nga napatay ang duha ka M16 rifles, tulo ka rifle grenade, duha ka magazine sa M16 rifles ug tulo ka backpacks nga dunay mga subersibong dokumento.