PAKYAS si Johnriel Casimero sa pag-ilog sa korona ni International Boxing Federation (IBF) flyweight champion Thai Amnat Ruenroeng sa miaging gabii sa Hua Mark Indoor Stadium sa Thailand.
Basi sa taho sa www.philboxing.com, si Ruenroeng migamit og hugaw nga mga taktika aron angkunon ang unanimous decision nga kadaugan.
Matod pa nga sulod sab sa pipila ka mga higayon nga natumba si Casimero gumikan kay iduot siya ni Ruengroeng paubos unya aduna sa’y mga higayon nga manggunit ang Thai fighter ug tuk-on sab niini sa iyang ilok ang Pinoyng challenger.
Ang mga gipangbuhat ni Ruenroeng giingong gipatuyangan ra sa American referee nga si Larry Doggett.
Unya sa 3rd round, klarong gitumba ni Casimero si Ruenroeng pinaagi sa tayming kaayo nga left hook apan wala kini gitawag sa referee nga knockdown.
Tataw nga rugi pa si Ruenroeng niadtong higayuna ug gimanduan siya sa referee nga ayuhon ang liston sa sapatos niini nga naghatag sa kampiyon og igong oras aron maka-recover.
Lahi ang nahitabo sa 2nd round kay nakapuntos og knockdown si Ruenroeng bisan tataw nga nawad-an lang sa balanse si Casimero.
Sa matag higayon nga makapasulod og makusog nga kumo si Casimero, gunitan dayon siya ni Ruenroeng ug iduot paubos aron mapugngan ang ataki sa Pinoy.
Giingon nga daghan pang illegal nga gipangbuhat si Ruenroeng apan ang tanan gibaliwala ra sa referee.
Si Ruenroeng misaka sa 16-0, 5KOs nga rekord samtang si Casimero natagak sa 21-3, 12KOs nga baraha.
Ang bantugang international promoter ug matchmaker nga si Sampson Lewkowicz, kinsa maoy nagdumala kang Casimero kaabag si Sammy Gelloani, misaad nga hatagan pa niya’g dakong away si Casimero.