SUSIHON sa Cebu City Government ang mga ilegal nga billboard nga nagpasundayag og mga produkto sa lainlaing dapit sa dakbayan.
Si City Administrator Lucelle Mercado nagkanayon nga ila nang gihisgotan sa zoning board lakip sa City Legal Office ang posibleng pagpatawag sa mga tag-iya og billboard nga wa mosubay sa husto nga proseso.
Matod ni Mercado nga ubayubay sa mga billboard nga adunay dagkong tarpaulin lakip na ang mga electronic billboard ang padayon nga nidaghan sa siyudad.
Iyang gipasabot nga delikado kini sa publiko ilabi na kon wa masubay ug masusi sa mga awtoridad.
“Ato gyud ning i-review kay kaning mga billboard could be a public hazard mao bitaw nang naa gyud tay mga balaod nga angay gyud nilang sundon unya ug di sila mosunod diretso lang sila og put-up without even bothering sa pagkuha og permit, mapugos ang siyudad to run after them,” pasabot sa City Admistrator.
Gitug-an ni Mercado nga adunay mga billboard sa siyudad nga ilang nahibaw-an nga ilegal, hinungdan nga ila na karong gihimoan og aksyon.
Ang City Administrator nagdumili sa pagbutyag kon asang dapita nga billboard sa dakbayan ang ilang nasayran nga ilegal apan nibutyag nga kon di motuman sa rekisito ang tag-iya niini hayan ila kining ipatangtang.
Si Mayor Michael Rama ug Bise Mayor Edgardo Labella una nang nimando sa Department of Engineering and Public Works (DEPW) sa pagsusi kon pila ka mga billboard ang nanukad sa siyudad ug pagsusi kon kumpleto ba ang billboard sa permit.