NAPALGAN nalang nga patay ang usa ka kawani sa Department of Education (DepEd) nga gidudahan nga naghikog apan padayon ang imbestigasyon sa kapulisan.
Nadiskubrehan kini alas 7:00 kagahapon sa buntag sa hagdanan sa PBN Plaza Housing, Nivel Hills, Barangay Busay, dakbayan sa Sugbo.
Ang biktima mao si Raul Ceballos, 45, ug anaa mag-alagad sa Dep-Ed Province isip dental assistant.
Ang napalgan duol sa wa nga kamot sa biktima ang usa ka kalibre 38 nga snubnose nga may usa ka kabhang ug upat ka mga bala.
Ang pasiunang imbestigasyon gihimo nila ni SPO2 Rommel Bangcog ug mga kauban sa Homicide Section sa Cebu City Police Office, nagbutyag nga nakadungog og sipang buto sa armas ang mga tawo nga anaa magpuyo sa palibot nianang kaadlawon apan, nianang buntag nakit-an na lang ang biktima nga naglingkod sa lawom nga hagdanan naglingkod nga mitakilid ang lawas.
Daling miresponde ang mga sakop sa Homicide Section sa CCPO sa dapit ug nakita nga may samad pinusilan sa ulo sa biktima ug ang sumbohan sa armas gisud sa iyang baba ug wa makalapos ang bala.
“May nakita mi nga mga tattoeng marks palibot sa iyang baba,” matod ni Bangcog.
Sa wa pa madungog ang buto, may silingan nga nakakita sa biktima nga naglakaw paingon sa dapit nga nahitaboan ug mitimbaya pa kini kaniya.
Dugang nasayran sa kapulisan gikan sa igsuon nga si James nga sa milabayng buwan misuway na sa pagpakamatay ang biktima pinaagi sa paghigot og pisi sa iyang liog apan napakgang human maputol ang pisi nga gihigot sa iyang liog.
Bisan sa naasoyng mga impormasyon nga nadawat sa kapulisan, ilang himuon pa ang dugang pakisusi, pagtino sa kamatayon sa biktima.