NANGANDAM na ang Police Regional Office (PRO) 7 sa posibling kadaot nga mahimo sa pagsige og bunok sa uwan sa tibuok Cenral Visayas.

Samtang gipaandam na usab ang ilang mga kahimanan sa search and rescue kon dunay mga lugar nga grabeng maapektohan sa kusog nga uwan.

Si PRO 7 chief Prudencio Bañas miingon nga andam ang tibuok puwersa sa kapulisan sa rehiyon nunot sa nasinating kusog nga uwan sukad pa niadtong mga milabayng adlaw nga mimugna og kusog nga baha sa kalungsuran ug sa mga bukirang barangay.

Usa sa gikabalak-an sa kapulisan ang mga nanimuyo niadtong mga lugar nga delikado sa pagdahili sa yuta ug pagbaha nga posibling madisgrasya.

Ang Regional Public Safety Battalion (RPSB) 7 maoy gitahasan nga mohimo og rescue operation kon dunay mga lugar nga angayan nga respondehan sang­lit sila ang gipaubos sa pagbansaybansay niadtong milabayng buwan.

Niadtong buwan sa Abril, gi-audit sa PRO 7 ang ilang mga gamit sama sa pisi, chainsaw, rubber boats, life vest, medical kit, pala, piko ug uban pang kagamitan sa search and rescue.

Giawhag hinuon niya ang publiko nga sila mismo ang magbantay nga kon duna nay kusog nga uwan kinahanglan nga mobakwit na sa labing luwas nga lugar ug di na huwaton nga dunay mobadlong gikan sa mga opisyal sa gobyerno.

Matod ni Bañas nga kinahanglan nga naleksyon na ang katawhan sa nahitabong disgrasya niadtong milabayng tuig diin adunay mga kinabuhi ang nakalas sa lungsod sa Dumanjug tungod sa pagbaha ug pagdahili sa yuta.

Dugang nilang pahimangno nga kanunay maminaw sa balita sa radyo aron masayran ang labing uwahing lakat sa panahon.

Ang Pag-Asa pormal nang mipahibawo nga nagsugod na ang rainy season ug pipila na unya ka adlaw ang masinati ang mga kusog nga uwan.