GIANGKON sa opisyal sa Pagkakaisa ng Samahan ng mga Tsuper at Opereytor Nationwide (Piston) nga dunay kahuyangan ang ilang paglusad og transport strike sa Sugbo karong adlawa.
Si Greg Perez, coordinator sa Piston Cebu, niingon nga gamay lang ang mosalmot sa ilang kalihokan kay ang uban sa ilang mga miyembro tua sa lagyong mga lugar, gawas sa Sugbo nanginabuhi ug wala usab sila nakakuha og suporta gikan sa ubang mga pundok sa transportasyon kay suma pa niini dili init ang hisgutanan sa Public Utility Vehicle (PUV) Modernization Program sa Sugbo.
“Naanad naman mi ana sa Piston. Ang Piston padayon nga makigbisog base sa kakayahan ug sa maabot lang namo,” pahayag ni Perez sa pakighinabi sa Superbalita Cebu kagahapon.
Matod niya nga wala usab kaayo'y impact sa dagan sa transportasyon ang ilang welga tungod kay gisuspenso sa Malacañang ang trabaho sa mga buhatan sa gobiyerno ug mga klase sa tanang mga ang-ang sa publiko ug pribadong mga tunghaan sa tibuok nasod.
Siya nibanabana nga 16 hangtod sa 20 porsiyento sa dagan sa transportasyon ang maapektuhan labi na sa dakbayan sa Mandaue diin kadaghan sa ilang mga miyembro nagagikan.
Siya namahayag nga 150 ngadto sa 200 ka mga drayber ug operator sa mga publikong sakyanan nga sakop sa Piston ang mosalmot sa kalihokan.
Apil sa maapektuhan, matod ni Perez, ang mga rota sa Pardo, Bulacao, Guadalupe, Englis-V. Rama, Mabolo ug Talamban sa siyudad sa Sugbo.
Nag-unang rason sa pagsalmot sa transport strike sa Piston Cebu ang bahin gihapon sa pag-phase out sa karaang PUJs nga nagpangidaron og 15 anyos ug pataas.
UBAN DILI MOSALMOT
Ang ubang transport groups sa Sugbo sama sa Cebu Integrated Transport Cooperative (Citrasco) ug National Confederation of Transportworkers Unity (NCTU) dili mosalmot sa welga.
Si Ryan Benjamin Yu, chairman ug general manager sa Citrasco, niingon nga gipasidan-an na niya daan ang iyang mga sakop nga dili mosalmot kon dili gikan sa ilahang grupo.
Samtang, si Romeo Armamento, national vice president for the Visayas sa NCTU, namahayag nga ang ilang grupo nipaluyo sa PUV Modernization Program sa Department of Transportation uban sa pasalig sa ahensiya nga motabang sa mga drayber ug operator sa pagpatuman sa programa.
Ang Piston dunay 400 ngadto sa 500 ka aktibo nga mga miyembro nga kadaghanan mga drayber og trisikol, samtang 2,000 kapin sa NCTU ug 1,000 ka units sa Citrasco
Tulo ka mga dapit ang tapukan sa mga miyembro sa Piston sugod alas 6 karong buntag-- sa tiilan sa unang taytayan sa siyudad sa Lapu-Lapu, Pacific Mall sa dakbayan sa Mandaue ug sa atubangan sa Land Bank of the Philippines sa dan P. del Rosario, siyudad sa Sugbo. Tapuson nila ang kalihokan pinaagi sa programa sa dan Colon karong udto.
PASIDAAN SA LTFRB 7
Si Land Transportation Franchising and Regulatory Board (LTFRB) 7 Director Ahmed Cuizon nipasidaan sa mga drayber nga moapil sa kalihokan sa Piston nga posibleng masuspenso ang prangkisa sa operator kon malapas sila sa mga kondisyon sa pag-isyu niini.
“Hinaot nga magmalinawon ang protesta tungod kay motahod man mi sa ilang demokratikanhong katungod..” pamulong ni Cuizon.
Sila nakaisyu na og special permits alang sa 20 ka mga bus sa Vallacar Transit, Inc., 10 ka mga bus sa Cebu City, 5 sa Mandaue City ug laing 5 sa Lapu-Lapu City nga motabang paghakot sa mga pasahero.
Matod sa direktor matag bus gitugtan mangolekta og tag P10 nga plitehan sa matag pasahero sa matag sakay.
Ang mga MyBus nga magbiyahian gikan sa South Road Properties sa Cebu City paingon sa Mactan Cebu International Airport maka-pick up ug makapanaog og mga pasahero basta dili molapas sa ilang rota.
Ang direktor nidugang nga duha ka teams sa LTFRB 7 ang iyang ipakatap aron mo-monitor sa kahimtang sa transportasyon sa Metro Cebu.
UBANG PANGANDAM
Mopakatap og 25 ka mga bus ang Cebu City Governmen.
Si Konsehal Dave Tumulak, deputy mayor on police matters ug chairman sa public order and safety sa konseho, nagkanayon nga 15 ka mga bus gikan sa City Hall ug dunay 10 ka mga Ceres bus.
Mopakatap usab ang Cebu City Police Office (CCPO) og personnel aron masiguro nga magpabiling malinawon ang nagkadaiyang kalihokan sa dakbayan sa Sugbo.
Matod ni Senior Insp. Narolf Tan, deputy chief sa Cebu Intelligence Branch sa CCPO, nga kapin sa 50 ka uniformed men ang ilang ipakatap karon.
Ibutang kini nila sa mga dalan nga apektado susama sa P.del Rosario ug sa Colon St.
Dugang ni Tan nga gawas sa uniformed men, aduna’y mga covert o civilian officers nga mag-monitor usab sa dapit aron luwas ang mamahimong protesta sa mga grupo.
Kagahapon, gitagbo usab ni Sr. Supt. Jonathan Cabal sa Regional Intelligence Division sa Police Regional Office (PRO) 7 ang nagkadaiyang grupo ug police headquarters aron pagahisgutan ang ilang mga pagpangandam. (HBL, PAC)