ANG pagsugod og tukod sa ikaduhang terminal sa Mactan Cebu International Airport (MCIA) nalantawan sa Department of Transportation and Communication nga mas mopaspas ang pag­lambo sa ekonomiya sa Sugbo ug maghatag og daghang trabaho sa mga Sugboanon.

Ang phase 1 sa katukoran sa terminal 2 sa MCIA pinaagi sa pribadong consortium nga GMR-Megawide Cebu Airport Corp. sugdan pinaagi sa groundbrea­king ceremony nga pangulohan mismo ni Presidente Benigno Aquino III karong alas 2 sa hapon.

Si DOTC Secretary Joseph Emilio Abaya, kinsa nihulagway sa MCIA nga world’s first resort airport, niingon nga ang kalamboan sa tugpahanan sinugdanan nga ang mga tugpahanan sa Pilipinas makaparang na sa mga labing nindot nga mga airport sa kalibotan.

“It will not only cement our place on the global map as a major tourist and business destination, it will boost the local economy and is projected to generate jobs especially in Cebu,” sumala sa kalihim sa opisyal nga pahayag niini nga gi-post sa Rappler.

Bisan sa higpit nga seguridad tungod sa presensya sa presidente sa tugpahanan karong adlawa, ang GMCAC niingon nga magpadayon ang normal operations sa MCIA.

Human sa groundbreaking, si Aquino mohimo og inspeksyon sa tugpahanan sa dili pa ang programa diin gipaabot nga siya mamulong sud sa 10 minutos.

Ang GMCAC nga 60 porsiyento gipanag-iya sa Filipino construction company nga Megawide Construction Corp. ug 40 porsiyento sa GMR Infrastructure Limited nga nagbase sa Bangalore, nilagda og concession agreement sa pagdumala ug pagpalambo sa Mactan airport sud sa 25 ka tuig.

Si Abaya nalipay nga sukad gitugyan ngadto sa GMCAC ang MCIA halos walo ka buwan na ang nakalabay, aduna na kini gihimo nga kalamboan sa kasamtangan nga terminal.

Apil na niini ang bag-ong white taxi boarding lanes, nga nahimutang tapad lang sa Domestic Arrival area, ang pagbukas sa Centralized Security Check o final security check area pinaagi sa 5 ka X-ray machines, bag-ong flight information display, lapad nga check-in counters ug uban pa.

Sa Agusto, ang GMCAC magbutang og VeriPax, usa ka device nga mag-verify sa flight ug boarding pass information alang sa mga pa­sahero.