KATORSE ka mga ta­wo ang nangaangol human nahaybul ang over-loaded nga pasaheroan nga multicab sa dulhugon kaayo ug dangog nga dalan sa Tisa Hills, Barangay Tisa, dakbayan sa Sugbo, niadtong Sabado sa alas 10:00 sa gabii.

Hinuon, ang multicab nasangit sa railings ug wala mahulog sa lawom nga pangpang sa dapit.

Ang mga nangaa­ngol mao sila si Ubrey Jones Ibones, drayber sa multicab; Breze Ibones, 1 ka tuig; Gidon Dedamo, 6; Cheche Ibones, 11; Niel Ibones, 10; Sieres Ong ,10; ug Jhon Michael Ondat, 14.

Uban sa mga bata ang ilang mga ginikanan ug apohan nga sila si Benjamin Ibones, 59; Judith Ibones, 55; Gigi Ibones, 35; Regelio Escandal, 35; Cora Ibones, 27; Mary Ann Ong, 38; ug Kiss Ong, 30.

Si SPO1 Baton sa Traf­fic Division niingon nga gikan nangaon ang pamilya sa kan-anan sa ibabaw sa bukid ug sa ilang pagpamauli, da­ngog ang dalan human sa kusog nga uwan.

Samtang nagdulhog, wa na makontrolar sa drayber ang sakyanan hinungdang nahaybul.