KONG mahilig mo og mga teleserye, siguro dili lang ako ang nakabantay niining usa ka teleserye nga wala gyud nihaom sa ilang time slot.

Matag alas 5:00 sa hapon, kadaghanan sa mga bata anaa sa balay gikan sa tunghaan ug kadaghan niini nila magpasalida dayon sa telebisyon inag abot.

Gawas sa mga bata nga nagtungha, ang gagmay nga mga bata dili maayong patan-awon sa mga salida nga dili pang bata.

Dunay usa ka teleserye matag alas 5:30 sa hapon human sa lokal nga balita sa usa ka telebisyon network nga morag dili maayong ipatan-aw sa mga bata.

Tungod lage kay kami manan-aw man og lokal nga balita samtang nag-andam sa panihapon, dunay mga panahon nga dili nato mabantayan ug ma-monitor nga nahuman na man diay ang balita ug nisunod na ang teleserye.

Natingala na lang ko nga gitawag ko sa akong anak kay ipatan-aw sa telebisyon dayon niya ingon "kiss sila my." Diin iyang gitumbok ang mga karakter sa teleserye nga nag-lips to lips.

Hinuon sa hingkod nga buot sa akong anak, wala kini malisya kaniya apan unsaon na man lang kadtong mga bata nga but-an na og nakasabot na sa ilang gitan-aw?

Ang mga bata ra ba karon lahi na sa unang panahon, dali na kaayong makasabot tungod sa ka-hi-tech sa panahon karon.

Akong nabantayan usab ani nga teleserye daghan kaayo og halok-halok nga pinapilit gyud ug isip usa ka inahan dili gyud siya haum sa iyang oras. Nganong dili man kini ibalhin sa oras nga wala na kaayo nga bata manan-aw.

Nganong nahimo man kini kaniadto sa ilang teleserye nga "Inday Bote" nga nalingawan ug gisunod sab sa akong tulo ka tuig nga anak.

Tinuod dunay mga parental guidance diha nga gibutang ug responsibilidad sa mga ginikanan ang pag-monitor sa mga bata kong unsa nga salida ang angay nga tan-awon apan dili sa tanang higayon nga ato kining mahimo tungod kay duna usab kitay mga bulohaton.

Labaw sa tanan, magbaton usab unta og responsable nga pagpagawas sa salida kining mga television network nga haom sa oras sa ilang mga viewers.