PATAY ang usa ka lalaki human nabangga ang gisakyan nga motorsiklo kagahapon alas 4:00 sa kaadlawon ning Dakbayan sa Cagayan de Oro.
Si Senior Poice Officer 4 Ricky Bagas sa Roads and Traffic Administration (RTA) niingon nga sa sinugdanan, wala pay identipikasyon sa namatay nga biktima tungod kay dili makasulti ug kritikal ang kahimtang sa kauban niining si Christopher Rey Moreno, 26.
Sa inisyal nga imbestigasyon, nasuta nga nabangga ang mga biktima nga sakay sa motorsiklo ngadto sa six wheeler truck, gimaneho ni Ramon Aringo.
Tungod sa kusog nga impak, ang wala mailang biktima ang nagrabehan human maayong pagkabunal sa ulo niini sa truck. Dead on the spot ang biktima samtang si Moreno dali nga gidala sa Northern Mindanao Medical Center (NMMC).
Sa uwahing imbestigasyon, nakumpirma nga ang nakabsan sa kinabuhi si Alvin Linian, hingkod ang edad.
Gibutyag ni Bagas nga mapasakaan og kaso ang driver sa truck tungod kay gidili ang pagparking sa dapit.
Sa bahin sa driver, gipasabot niini nga katulgon gyod kaayo siya tungod sa taas nga biyahe ug paingon pa sila sa weste aron unta magdeliver og abuno. Nihunong siya sa tulay aron unta matulog kadyot.
Igo lamang siya nakapiyong nakurat na lamang siya dihang kusog nga labunog iyang nadungog tungod mibangga sa iyang truck ang motorsiklo.