HAPIT na ang ikaupat nga anibersaryo sa paghapak sa dakong bahin sa Bisayas sa super typhoon Yolanda. Apan hangtod karon, mayoriya kanila ang wa gihapoy tarong nga kapuy-an.
Nobiyembre 8, 2013 dihang niagi ang labing kusog nga bagyo nga nasinati sa kalibutan dinhi sa Kabisay-an.
Pipila ka libo ang patay. Samot pa kadaghan ang nawad-ag mga pinuy-anan.
Tuod man, nitabang ang tibuok kalibotan.
Ang rehabilitasyon sa naapektohan sa Yolanda nahimo sab nga dakong hagit alang sa kagamhanang Aquino.
Apan nahuman na lang ang termino ni PNOY, way tarong nga housing site nga nahuman. Ug kining nahimong dakong isyu nga nakapapildi sa iyang kandidato nga si Mar Roxas sa miaging piliay sa 2016.
Nisuporta ang katawhan kang Duterte nga gituohang action man ug may lig-on nga political will.
Tuod man, nibisita si Digong sa Tacloban pag Nov. 8, 2016.
Nimando ang presidente nga paspasan ang rehabilitasyon sa mga Yolanda survivor ug gitudlo ang Sugboanong si Presidential Assistant Mike Dino isip Yolanda housing czar.
Nagtuo ang tanan, subay sa pamahayag ni Dino mga 18 ka adlaw sukad gitudlo siya ni Presidente, nasulbad gyud tuod.
Mao nga daghan dinhi sa Syudad sa Sugbo ang nakalitan dihang nibuto ang balita kabahin mga anomaliya sa Yolanda housing projects.
Nagtuo man gud kita nga okay na. Apan nahimong nasudnon nga balita ang House inquiry ni Kong. Albee Benitez ug Kong. Ben Evardone kabahin sa mga anomaliya.
Dayon nasundan kini sa usa ka reklamo nga naabot sa Opisina sa Presidente nga nagkwestyon nganong way nahimo si Dino.
Nahibulong ko nganong way deriktang tubag si presidential assistant. Tungod ba sa pagtuo nga di modagan ang istorya kon maghilom lang?
Ang problema lang kay samtang magkaduol ang ikaupat nga anibersaryo sa Yolanda, magkadaghan ang mangutana kon unsa man gyud.
Diha sa Maghisgot Kitag Politika Bay, nagkauyon mi ni Sir Bert Emphasis nga kining isyu nga Yolanda dunay dakong epekto sa popularidad ni Presidente Duterte.
Kinahanglan niya ang aksyon nga di na moabot pag laing tuig. Mas maayo man gani unta og makaingon siya nga nasulbad na karong Nob. 8, 2017.
Kon mahimo kini ni Dino, well and good.
(@anol_cebu sa Twitter)