GIPUTOS og masking tape ang nawong lakip na ang tiil sa usa ka lalaki dihang napalgan sa kasagbutan nga wala nay kinabuhi kagahapon alas 5:50 sa kaadlawon sa Upper Macasandig ning Dakbayan sa Cagayan de Oro.
Ang biktima gibinaklid paggapos ug nagsul-ob og puti nga T-shirt ug maong nga pantalon. Nakaangkon kini og mga samad pinusilan sa dughan ug sa liog samtang adunay patik sa wala nga kilid, tuo nga bahin sa abaga ug likod.
Sa inisiyal nga imbestigasiyon sa Police Station-Zamboanga Peninsula pinaagi sa pagpangulo ni Police Officer 2 Ariel Reusora, gibutyag niini sa Sun.Star Superbalita nga padayon pa ang ilang imbestigasiyon aron masuta ang tinuod nga motibo sa maong krimen.
Dihang girespondehan sa kapolisan ang maong insidente sa pagpangulo ni Police Senior Inspector Rixel Torayno, nasayran nga usa ka nag-jogging sa maong dapit ang nakakita sa patay'ng lawas.
Narekober gikan sa crime scene ang tulo ka mga basiyo sa bala og isa ka buhing bala sa kalibre .45, usa ka face towel nga kolor blue, gum-os nga papel ug green nga cellophane.
Wala pa usab gikompirma sa kapolisan kung drug paraphernalia ang maong narekober tungod kay dalhon pa ang maong mga butang sa crime laboratory.
Girespondehan usab sa Scene of the Crime Operatives ang insidente ug nasutang anaa pa sa sulod sa 24 ka oras gikan sa pagpatay sa biktima.
Padayon pa ang imbestigasiyon sa kapolisan aron maila ang identipikasiyon sa biktima ug masuta ang tinuod nga motibo sa pagpatay niini.