HOT topic karon ang depression nga nagsugod sa komedya ni Joey de Leon nga hinimohimo ra kuno sa tawo ang maong sakit. Unya, nasundan pa sa paghikog sa manghud ni Nadine Lustre.
Naay punto si Joey kay ang depression usahay usa na ka genetic disease. Ang sayup lang kay maorag bugalbugal ang iyang pagkasulti.
Wala may dautan kon ma-depress ang tawo, kinsa may walay problema nato aning kalibutana.
Pero kon maghikog ka kay di na ka kaagwanta, lain na sad nang estoryaha. Nagkinahanglan na ka ana og tabang medical, psychological ug espiritwal.
Kadaghan na ta kadungog nga kato hinuong mga hingatawa ug komedyante di ba mao pa hinuoy labing desperado diay sa tanan.
Dili lang ta mo-judge kay walay perfect nato. Magpasalamat lang ta kon unsay gihatag sa Ginoo. Ang importante nga duna tay pagtahud taliwa sa atong kalahian isip indibidwal ug atong gipuy-an ang kinabuhi pinasikad sa iyang kabubut-on.
Bb. Cebu 2017
Gisugat og mga kontrobersiya ang labing unang beauty pageant sa Binibining Cebu tungod sa giingong bulok pulitika.
Dunay mga espekulasyon nga ang Bb. Cebu mao kunoy puli sa “Miss Cebu” nga giwagtang sa Sinulog human nahibalik pagkamayor sa dakbayan sa Sugbo si Tommy Osmeña.
Gitakda ang Bb. Cebu karong Oktubre 28 nga mao say adlawng natawhan ni kanhi Cebu City Mayor Michael Rama.
Kini ug uban pa tubagon tanan sa sikat nga international interior designer Kenneth Cobonpue, ang Creative Producer sa Binibining Cebu ug sakup sa Sacred Heart School for Boys Batch 1985 nga maoy nag-organisar sa maong pageant. Ugma na sa atong Ssssuper Ka!
“Geostorm”
Mao ni salidaha nga wa na magkinahanglan og bug-at nga estorya kay sa visualization ug special effects pa lang, daug na.
Sa “Geostorm,” si Gerard Butler nidala nga American rocket scientist Jake Lawson, nga nahimong bayani human iyang napakgang ang global warming pinaagi sa iyang gihimong satellite system. Na-capture sa pelikula ang nagkadaiyang emosyon sa mga karakter nga nakapadugang sa kulbahinam sa “Geostorm.”
Ablihan na
Good news kay ablihan na kuno ang Suba bridge sa Liloan karong Oktubre 23, alas 10 sa buntag. Sa ato pa, makapaabot ta nga moluagluag na ang traffic sa national highway sa norte.
Gisirad-an ni sukad pa Nobyembre sa miaging tuig kay naguba. Mao nang tanang sakyanan karon gikan norte padung siyudad sa Mandaue ug siyudad sa Sugbo o vice versa, ari tanan agi sa national highway. Karong ablihan na, hinaot makaginhawa na ta gamay aron di na ta ma-depress. Huh!