BATA palang si Samuel Tadeo, gusto na unta niyang mamahimo nga pulis, apan aduna’y usa ka panghitabo nga nahimo siyang bombero.
Dihang nag-criminology siya niadtong 1983 hangtod 1986, wala siya magdahom nga atol sa training sa pagkapulis, mapunta diay siya sa pagkabombero.
Karon, usa na ka dakong opisyal sa kabomberohan si Tadeo.
Si Sr. Supt. Samuel Tadeo ang kasamtangan nga regional director sa Central Visayas.
Matod niya nga bata pa lang siya dihang nag-boy scout siya, didto nagsugod ang iyang damgo nga mamahimong pulis.
Dihang nakigtagbo siya kaniadto kang Maj. General Alexander Aguirre sa mga police trainees, gitunga niini ang applicants ug naapil si Tadeo sa mga gibutang sa Bureau of Fire Protection (BFP).
Wala na siyay nahimo tungod kay gidiretso na dayon sila sa training camp.
Didto na nagsugod ang career ni Tadeo isip bombero.
Anaa sa dakbayan sa Quezon sa kaulohan nadestino si Tadeo isip imbestigador sukad niadtong 1988-2000.
Usa sa kaso nga nadala niya kining gihulagway nga “Disco Inferno” o ang Ozone Disco Club fire.
Tuig 2016, dihang nadestino siya sa Central Visayas ug bisan paman nga regional director na siya, hands-on gihapon siya sa panahon nga aduna’y sunog.
Matod ni Tadeo nga gimandoan niya iyang mga fire marshall nga moresponde og apil sa panahon sa sunog.
Anaa sa Quezon iyahang pamilya, lumad usab siya sa Abra diin siya ang ikatulo sa pito ka managsuon.
“Basta ako laking mahirap na nagsumikap.” Upat na ang anak ni Tadeo diin ang kamaguwangan niini nisunod sa iyang propesyon.
Usa na kini ka Fire Officer 2 sa Quezon City.
Giangkon ni Tadeo nga kuwang gihapon sila og personnel ug ekipo sa BFP 7 apan hinay-hinay nila kini nga gisulbad nga problema.
Anaa na’y kapin sa 1,400 ka mga personnel ang BFP 7.
Niubos usab ang fire incident sa rehiyon ubos sa iyang pagpangulo gikan sa 635 ka mga sunog gikan Enero-Agusto 2016 itandi sa susamang mga buwan karong tuiga nga 435 lang kun ubos kini og 30%.
Bisan unsa diay ang imong tinguha sa kinabuhi, kon ang Ginuo dunay laing plano kanimo, ang Iyang pagbuot maoy matuman.