Hontiveros sa Alab moduwa

PINAAGI sa usa ka press conference karong adlawa sa Manila, opisyal na nga ipaila ang gitawag og Cebuano Hotshot nga si Dondon Hontiveros isip labing bag-ong miyembro sa Alab Pilipinas nga mokombati sa umaabot nga Association of Southeast Asian Nations (Asean) Basketball League.

Mismong si Hontiveros maoy nipahibalo niini dihang gikahinabi ning mantalaan kagahapon sa cellphone.

Nagkanayon ang produkto sa University of Cebu (UC) Webmasters nga naghinamhinam na nga mopakita og aksyon ning bag-ong liga nga iyang duwaan hilabi na kay ikauban niya’g balik ang dugay na niyang kauban sa national team nga si Jimmy Alapag. Hinuon ning higayuna, dili moduwa si Alapag kon dili maoy coach sa team.

Dili pa lang dugay, ang 40 anyos nga basketbolista gibuhian sa Alaska Aces sa Philippine Basketball Association (PBA).

“Nindot ni nga experience para nako hilabi na kay mag-uban mi’g balik ni Jimmy,” matod ni Hontiveros.

“Gusto sab ko maka-share ko sa akong experiences sa batan-on namo nga kauban. Excited sab ko laing Cebuano sa team nga so Oping Sumalinog. Pareha ni siya og height nako unya shooter sab.”

Sama ni Hontiveros, si Sumalinog kanhi high school varsity player sa Don Bosco Technological Center (DBTC) Greywolves.

Gitataw ni Hontiveros nga mapasalamaton siya sa Alaska ug nakasabot siya nga wala na siya hatagi og contract extension sa 1999 Grandslam champion gumikan kay nagporma kini og team nga langkuban og batan-ong mga magduduwa.

“Nakasabot man ko sa Alaska kay naa man sila karon sa rebuilding process,” pasabot ni Hontiveros.

Matod ni Hontiveros nga mga duha na sab ka semana siyang miapil sa praktis sa Alab Pilipinas bisan dili pa opisyal ang iyang pagkasakop sa team.

“In good faith, gusto nako ipakita nga bisan 40 years old nako, kaya gihapon nakong moduwa. Gusto ko nga naa ko sa condition kay lain man kon mopirma ko sa Alab unya dili na diay ko maka-deliver,” batbat ni Hontiveros.

Gawas nila ni Hontiveros ug Sumalinog, ang uban pang nasulod na sa Alab mao sila si Paolo Javelona, Josh Urbiztondo, Bobby Ray Parks, American import Ivan Johnson, Lawrence Domingo, ug Robby Celiz.

Mosugod ang kampanya sa Alab Pilipinas karong Nobiyembre 19 diin 20 ka mga duwa ang sagubangon niini sa elimination round.

Napulo ka mga duwa ang ipahigayon sa gawas sa nasod samtang ang laing 10 anhi ipahigayon.

Gipahibalo ni Hontiveros nga ning higayuna, dili lang sa Manila ipahigayon ang host games sa Alab Pilipinas ug motuyok kini sa lainlaing mga dapit diin usa dakbayab sa Sugbo sa giplanuhang pahigayunan. (ESL)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph