MALINAWON. Hapsay. Normal ang dagan sa trapiko.
Kini ang kinatibuk-ang assessment ni Chief Supt. Jose Mario Espino, direktor sa Police Regional Office (PRO) 7, sa transposrt triek kagahapon sa Central Visayas base sa mga taho gikan sa nagkalainlaing police stations sa rehiyon.
Dinhi sa Mero Cebu, gibanabana nga 80 ka mga miyembro sa Pinagkaisang Samahan ng mga Tsuper at Operator Nationwide (Piston) ug pipila ka mga progresibong grupo ang miduyog sa gihimong protesta.
“Very cooperative sila after our dialogue kase at yun naman it turn out there will be having their rally peacefully at a certain time lang,” matod ni Chief Supt. Jose Mario Espino.
Si Land Transportation Franchising and Regulatory Board (LTFRB) 7 Director Ahmed Cuizon niingon nga daghan ang nanagan nga mga jeepney sa kadalanan ug igo-igo ang mga pagpangandam nga gihimo sa mga local government unit.
“Sa kinatibuk-an, hapsay ug maayo ra ang kahimtang sa mga pasahero ug sa katawhan,” dugang sa director sa Superbalita Cebu.
Alang ni Cuizon angay nga ipadayon ang Public Utility Vehicle (PUV) Modernization Program kay makaayo kini sa katawhan pinaagi sa bag-ong mga sakyanan de-pasaheroan nga moderno, hapsay, kasaligan ug mas luwas alang sa tanan.
Samtang, gisalikway sa presidente sa Piston nga si George San Mateo ang pasangil ni Atty. Aileen Lizada, board member sa LTFRB, nga posibleng kabahin sa destabilisasyon ang lihok protesta sa mga drayber ug operators.
Si San Mateo nanalipod nga gisuportahan lang sa ubang pundok ang kalihokan sa transport groups nga nipadayag og pagsupak sa PUV Modernization Program labi na ang pagwagtang sa 15 anyos ug pataas nga mga public utility jeepney.
BIsan sa dakbayan sa Mandaue nga dunay daghang sakop sa Piston, way dakong epekto sa welga.
Kini maoy gibutyag sa pangulo sa Traffic Enforcement Agency of Mandaue (TEAM) nga si Glenn Antigua sa dihang nahinabi sa Superbalita Cebu kagahapon.
Matod ni Antigua nga dakong natampo ang pagkasuspenso sa trabaho sa tanang ahensya sa gobyerno ug klase sa pampublikong tunghaan nga wa nakaparalisar ang strike sa dagan sa transportasyon sa dakbayan.
Way mga natanggong mga mga pasahero atol sa strike kagahapon.
Gibutyag ni Antigua nga wa magamit sa dakbayan ang di mominos sa 20 ka mga naka-standby nga sakyanan apan pabilin kining giandam sa city hall.
Samtang, wa mosalmot sa nationwide transport strike ang mga PUJ sa Lapu-Lapu City ilabi na niadtong nagbiyahi-an og Mandaue City apan mga PUJ drayber naproblema kay way mga pasahero nga nanakay.
“Nabali naman hinuon morag ang pasahero maoy nag-strike kay nagnihit,” matod pa sa OIC sa City Traffic Management Services, Mario Napule.
Si Napule nga nag-atang sa PUJ terminal sa barangay Pajo, Lapu-Lapu City mihulagway nga wa makapi-ang ang transport strike sa operasyon sa mga PUJ drayber kay ang grupo sa Lapu-Lapu wa mo-apil niini.
Samtang ang city bus ug barangay vehicles nga gipa-deploy ni Mayor Paz Radaza ngadto sa mga terminal sa Pajo ug Tamiya gipa-stand by sa maong areas sukad pa sa 5:30 sa kaadlawon.
Lakip sa dakbayan sa Sugbo ug Talisay, normal nga dagan sa trapiko. Wala magamit ang ilang giandam nga sakyanan.
Nasyaran nga apil sa nipaluyo sa Piston ang Kadamay, Migrante, League of Filipino Students, ug Kilusang Mayo Uno. (SCG, AYB, JPP, FVQ)