MAMATIKDAN nga taliwala sa nationwide transport strike kagahapong adlawa daghan gihapon sa mga public utility vehicle (PUV) ang nagdagan ug padayon sa ilang pagpamasada.
Rason sa pipila ka mga driver nga dili sila mahimong mawad-an sa ilang panginabuhian tungod kay kini lamang ang ilang gisaligan sa adlaw-adlaw nga panginahanglan.
Si Teofilo Lagbas driver sa Patag Liner nibutyag sa interbyu sa SunStar SuperBalita nga suportado kaayo niya ang transport strike ug kausa siya sa transport group nga mosupak sa pag-phase out sa mga karaang PUV apan dili niya buot nga mawad-an og pagkaon karong adlawa kay aron lang mosalmot niini.
"Maka-boundary lang ko karon ug makapalit ug kunsomo karon mohunong ko sa pasada," pasalig niini.
Apan si Ringo Lago, Secretary General sa Ang Pinagkaisahang Samahan ng mga Tsuper at Operator Nationwide (Piston) sa Northern Mindanao, una na nga nibutyag nga nasayod na siya sa mga alibi sa pipila ka mga driver ug iya kining nasabtan.
"Kining atong panawagan ug pagsupak sa ilang giingong PUV modernization program kung mapugngan kini kinsa man gihapon ang makabenipisyo nga ang mga driver ra man sab," matud ni Lago.
Dugang niini nga duha kini ka adlaw nga transport strike ug iyang gilaumang ang mga individual nga mga driver mosalmot niini.
Una na usab nga gibutyag ni Lago nga bug-at kini nga transport strike gumikan kay bisan ang gobyerno midesisyon nga isuspenso ang tanang klase lakip trabaho sa gobyerno.
Samtang ang PUV modernization program usa kini ka lakang sa gobyerno nga mahimong luwas ug komportable, convenient ug environment-friendly ang tanan PUV sama sa bus, jeepneys, ug public utility vans.
Sa maong programa ang mga bag-ong PUV kinahanglan adunay GPS ug CCTVs nga magmonitor sa driver lakip ang mga pasahero.
Butangan usab sila og speed limit ug adunay nakadestino nga safety officers ug sayon nga acces sa mga person with disability.
Apan una na nga gipasabot ni Lago ang rason ngano ila kining gisupak tungod kay apektado ang mga yanong driver ug mga operator kung ila gyod pugson nga mapatuman kining PUV modernization program tungod kay daw motaas ang renta sa operator taas na usab ang boundary sa mga pampasaherong sakyanan mao nga dako silang supak niini tungod kay mahal man ang mga bag-ong sakyanan.
"Ang mahitabo man gud dayon samot nga magkalisod lisod atong mga driver ug tanan tibuok pamilya apektado na dayon kay atong suholan gamay lang gihapon kaayo." dugang ni Lago.