TAGUM CITY, Davao del Norte - Pormal na gibuksan ang Indigenous Peoples (IP) Games didto sa Davao del Norte Sports and Tourism Complex dinhi niadtong Biyernes, apan si Davao del Norte Governor Anthony G. Del Rosario mibutyag nga kinahanglan sab dinhi hmiuon ang National IP Games sanglit ang probinsya andam na mag-host bisan kanus-a.
Kini ang iyang gisulti atol sa iyang inspirational message nga anaa sila Philippine Sports Commission (PSC) Board atol sa programa - Commissioners Charles Raymond A. Maxey, Ramon Fernandez ug Celia Kiram - diin ang unom ka liga sa IP Games himuon karong tuiga, wala malakip ang national championship.
Samtang, si Maxey, ang oversight commissioner-in-charge sa IP Games ug Mindanao, daling midawat sa hagit.
"Ingon ni Governor Del Rosario kung pwede daw mag-national diri sa Davao del Norte nganong dili," ni Maxey ngadto sa mga partisipante nga nalipay sa gianunsyo.
Niya pa nga ang PSC sa pagpangulo ni Chairman William "Butch" Ramirez magpadayon sa pagsuporta sa IP Games nga dakong oportunidad aron ipakita ang kultura ug tradisyon sa nagkadaiyang tribu sa nasud.
Sa laing interbyu, gisulti ni Maxey nga ilang gikonsidera nga himuon ang National IP Games sunod tuiga apan kinahanglan kini planohan ug aprubahan sa PSC Board.
Sa bahin ni Commissioner Ramon Fernandez, kinsa mipresenta kang Chairman Ramirez, miawhag sab sa mga partisipante nga moduwa ug maglingaw-lingaw sanglit gikonsidera nga ang international IP Games himuon matag human sa Olympics, "Naa koy nakita nga mga lolo at lola, duna pamoy chance nga maging Olympians... maging Olympic medalists."
Ang Ata-Manobo, Sama, Dibabawon, Mandaya, Mangguangan, ug Mansaka delegado gikan New Corella, Talaingod, Carmen, Panabo City, Sto. Tomas, Asuncion, Kapalong, Tagum City, Dujali, Island Garden City of Samal ug San Isidro ang nagtigi sa duha ka adlaw nga torneyo nga dunay Kadang-Kadang sa Bagol, Kadang-Kadang sa Bamboo, Lubok sa Humay, Butong sa Lubid, Pana, Bangkaw, Basket sa Likod, 4x100m event ug 100-meter run.