USA ko sa mga Pilipino nga nisaludo sa atong mga sundalo nga maisugon nga miasdang sa giyera sa Marawi City diin naghari ang Maute Group ug Abu Sayyaf.
Mao nga dihang gideklara ni Presidente Rodrigo Duterte kagahapon, Martes, nga 'liberated' na ang Marawi gikan sa impluwensya sa mga terorista, di matukib ang akong kalipay.
Nalipay ako sanglit hinay-hinay na nga makalingkawas ang atong mga igsuon sa maong dapit sa krisis bunga sa giyera nga mikalas sa kinabuhi sa libuan ka mga tawo.
Di lalim ang gibating kalisud sa mga residente sa maong dapit. Ang napundar nilang panginabuhian napulbos tungod sa pagpamomba. Tuod man, napatay sila Maute group leader Omar Maute ug Abu Sayyaf leader Isnilon Hapilon.
Libuan ka mga residente karon nga halos wa nay gikaon ug daghang mga negusyante ang nakasinati sa kapobrehon. Busa, ako sa mga nanawagan sa gobyerno nga paspasan ang rehabilitasyon.
Gawas sa imprastraktura, ihatag usab sa gobyerno ang panginabuhian aron di sila mangamatay sa pasmo. Ug, hinaut nga way mga kurap nga opisyal sa gobyerno nga makapahimulos sa mga proyekto.
Transport strike
Dako ang epekto sa duha ka adlaw nga transport strike nga gilusad sa Pinag-isang Samahan ng mga Tsuper at Operator Nationwide (PISTON) batok sa ipatuman ang jeepney modernization program.
Gani, gipasiatab ni Piston national president George San Mateo nga napildi nila ang gobyerno sa ilang gihimong strike.
Nahitabo ang strike tungod kay nabalaka sila nga kung mahinayon ang plano sa gobyerno nga modernisasyon, mawad-an og panginabuhian ang giingon nilang 600,000 ka mga jeepney drivers ug 300,000 ka mga operators.
Tungod sa ilang gihimo, nagbahad ang gobyerno nga pasakaan og kaso ang mga nag-strike kay ilang gisabotahe ang ekonomiya sa nasud, segun sa rekomendasyon ni Philippine Stock Exchange (PSE) director Vivian Locsin.
Sa akong nakita, malikayan ang halapad nga welga kung ang gobyerno mangunsulta daan sa tanang sektor panahon nga duna silay himuong balaudnon, polisiya, o programa.
Federalism
Akong ipadangat ang pasalamat sa tanang estudyante nga nagboluntaryo sa among gihimong Colloquium on Federalism, usa ka community extension project sa University of Mindanao Professional Schools niadtong Sabado, Oktubre 14.
Gatusan sa mga partisipante nga gilangkuban sa estudyante ug functionaries sa Brgy. Magtuod, Brgy. Maa, ug Brgy. 76-A Bucana ang mitambong sa aktibidad nga nagpasabot sa pederalismo nga panggobyerno.
Ang diskusyon nila Dr. Adrian Tamayo ug Dr. Chito Gavino maoy mahimong basehan sa mga partisipante sa ila unyang pagboto sa himuong plebisito.
Mabuhay po ang tanang professors ug staff sa Professional Schools nga gipangulohan ni Dean Eugenio S. Guhao, Jr., D.M.!