Dalaygon ang tinguha ni Mayor Michael Rama sa pagwagtang sa spaghetti wires o nagkagubot nga kutay sa wires sa service utility firms nga ningsakay sa karaang poste sa Visayan Electric. Gawas nga ngil-ad tan-awon, risgo usab ang nagkayamokat nga wires.
Sa Technical Infrastructure Committee meeting sa dakbayan sa Sugbo niadtong Lunes, Oktubre 10, 2022, gikataho nga si Rama nipadayag sa kasagmuyo sa nagpabiling spaghetti wires ug nimando nga mahan-ay o mawala kini sa dili pa motapos ning tuiga.
Nindot ang tinguha sa mayor apan maisip nga sama sa damgo tungod sa kaapiki sa tagal nga panahon. Samtang maayong magkauyon sa ilang hunahuna kon unsa nga matang sa pagpanglimpiyo, ang pagpuyos ba sa wires o ang underground cabling.
Bisan dili lawom og teknikal nga kahibalo, apan sa sayong paghunahuna, ang pagpuyos sa wires sama sa nahimo na sa ubang bahin sa dakbayan momugna og laing problema, gawas nga wala kini hingpit makasulbad sa kangil-ad sa panan-aw.
Ang service utility firms seguradong maglisod sa pagsubay o ayo sa ilang linya ug pagguba sa gipuyos nga wires kon dunay reklamo ang ilang kustomer. Sa nakita sa Brgy. Sambag 1 nga usa sa unang giingong napahan-ay, gubot gihapon tan-awon.
Busa ang ideyal mao ang underground cabling apan dili kini masayonsayon hangtod sa Disyembre 2022. Molanat og taas nga katuigan ug dakong budget. Ang Visayan Electric hinahinay nang nilatid sa ilang underground cabling. Dili kaha mahimo nga ang ubang service utilities mosakay niini?
Si Cebu City Councilor Jerry Guardo, tsirman sa committee on infrastructure nga nagtutok sa isyu sa spaghetti wires, nagkanayon nga ang hagit ni Rama bahin sa pagwagtang sa spaghetti wires sa kadalanan sa Disyembre 2022 “doable.” Maayo, ato kining nuntan.
Sakto ang hagit sa mayor. Apan maayong magkauyon ang ilang hunahuna sa angay kab-uton sulod sa igong panahon aron di mogawas nga pakyas ang iyang dalaygong tinguha.