NAGBANGOTAN karon ang mga Sugboanon hilabi na ang simbahang Katoliko human mitaliwan kagahapon ang giisip nga labing senior nga cardinal sa nasod.
Si Cebu Archbishop Emeritus Ricardo Cardinal Vidal, 86, mitaliwan alas 7:26 sa buntag sa Intensive Care Unit (ICU) sa Perpetual Succor Hospital.
Nadala siya sa tambalanan niadtong Oktubre 11.
Matod ni Msgr. Joseph Tan, tigpamaba sa Archdiocese of Cebu, nga septic shock ang hinungdan sa iyang kamatayon.
Sa septic shock, moubos og maayo ang blood pressure nga moresulta sagad sa organ ug heart failure ngadto sa kamatayon.
Dugang ni Tan nga nakurat sila sa kamatayon ni Vidal tungod kay nihatag ang doktor kanila og report nga ni-stable na ang kondisyon sa cardinal human siya na semi-comatose tungod sa pneumonia niadtong nakalabay nga semana.
Masulub-on ang manghud ni Vidal nga si Juanito, 84 sa kamatayon sa maguwang.
Dihang nahibawo si Juanito nga na-ospital iyang maguwang, dali kining nilarga gikan sa Manila paingon sa Sugbo.
Gibutyag usab niya sa tigbalita nga gimingaw siya sa iyang igsuon dihang nadestino kini sa Sugbo kinsa iyang gihulagway nga iyang bestfriend.
“Salamat sa pag-alala sa aking kapatid. Salamat po sa pag-alaga sa kanya,” matod ni Juanito.
Si Msgr. Ruben Labajo, pangu sa mga pastor sa Cebu Metropolitan Cathedral, nagkanayon nga anaa sa Cathedral ang haya ni Vidal alang usab sa public viewing.
Dugang ni Labajo nga 24 oras nga abli ang Cathedral hangtod ugma alang sa public viewing sa di pa ibalhin sa Archbishop’s Palace.
Si Fr. Jojo de Aquino, personal secretary ni Vidal nihulagway usab nga isog nga tawo ang Cardinal nga giisip na usab niya nga amahan.
Si Vidal kinsa usa ka lumad sa Mogpog sa probinsiya sa Marinduque, mao ang ikalima nga anak sa unom ka managsuon.
Dihang bata pa siya, usa si Vidal sa first communicants atol sa ika-33 nga International Eucharistic Congress nga gihimo sa Manila niadtong 1937.
Giordinahan siya isip pari niadtong 1956 sa St. Ferdinand Cathedral sa dakbayan sa Lucena.
Niadtong 1981, si Pope (karon Santos) John Paul II nitudlo kang Vidal isip coadjutor archbishop sa Sugbo.
Siya mao ang ni puli kang kanhi Julio Cardinal Rosales human kini mipanaw sunod tuig niana.
Nahimong Cardinal si Vidal niadtong Mayo 25, 1985 kinsa usa usab siya sa nagpalapad sa karon Cathedral.
Nangulo usab siya aron ma-canonize ang Bisaya nga martyr nga si Pedro Calungsod ug ang padayon nga beatification ni Archbishop Teofilo Camomot.
Niadtong 1986 dihang siya pa ang presidente sa Catholic Bishops Conference of the Philippines nangulo usab siya sa demokrasya sa nasod.
Niadtong 1989 dihang siya mao ang nagpatunga tali sa sa mga tropa sa gobyerno ug sa mga rebeldeng sundawo nga gipangulohan ni Brig. Gen. Jose Comendador sa suway nga kudeta niini sa isla sa Mactan.
Tuig 2011, dihang ninaog si Vidal isip arsobispo sa Sugbo aron ihatag kini kang Palma.